पुणे : महापालिकेच्या घनकचरा व्यवस्थापन विभागाने एक महत्त्वाचा निर्णय घेतला आहे. सार्वजनिक ठिकाणी, पदपथ आणि रस्त्यांवर कचरा टाकणाऱ्यांना जरब बसावी, यासाठीची दंडाची रक्कम वाढविण्यात आली आहे. यापूर्वी उघड्यावर कचरा टाकणाऱ्यांना केवळ १८० रुपयांचा दंड आकारला जात होता. आता दंडाची रक्कम ५०० रुपये करण्यात आली आहे.
दंडाच्या रकमेत वाढ केल्याने सार्वजनिक ठिकाणी कचरा टाकण्याचे प्रकार थांबतील, असा महापालिका प्रशासनाचा दावा आहे. घनकचरा व्यवस्थापन विभागाचा हा प्रस्ताव अतिरिक्त आयुक्तांच्या मान्यतेनुसार आयुक्त कार्यालयाकडे पाठविण्यात येणार आहे. त्यानंतर स्थायी समिती आणि मुख्य सभेच्या मान्यतेनंतर तो राज्य शासनाकडे पाठविण्यात येईल. त्यानंतर या प्रस्तावाची अंमलबजावणी होणार आहे. मात्र, दंडाची रक्कम वाढविल्यानंतरही सार्वजनिक ठिकाणी कचरा टाकण्याचे प्रकार थांबण्याची शक्यता कमी आहे.
रस्ता अथवा सार्वजनिक ठिकाणी कचरा टाकून अस्वच्छता करणे; उघड्यावर लघुशंका करणे; सार्वजनिक मालमत्तेचे विद्रुपीकरण करणे, छोटे स्टिकर्स लावणे, व्यावसायिक आस्थापनांमार्फत कचरापेटी न ठेवणे, सार्वजनिक ठिकाणी, पदपथांवर, उघड्यावर कचरा टाकणाऱ्यांविरोधात महापालिकेकडून दंडात्मक कारवाई केली जाते. उघड्यावर कचरा टाकणाऱ्यांना सध्या नियमानुसार १८० रुपयांचा दंड आकारला जातो. दंडाची रक्कम पूर्वी शासन मान्यतेने निश्चित करण्यात आली आहे. त्यात कालानुरूप वाढ झालेली नाही. त्यामुळे दंडाच्या रकमेत वाढ करण्यात आली असून, यापुढे १८० रुपयांऐवजी ५०० रुपयांचा दंड आकारण्याचे प्रस्तावित करण्यात आले आहे.
शासनाच्या मान्यतेनंतर सुधारित दंड आकारणार
या प्रस्तावाबाबत बोलताना पुणे महापालिकेचे अतिरिक्त आयुक्त डॉ. कुणाल खेमनार म्हणाले की, सार्वजनिक ठिकाणी, उघड्यावर कचरा टाकणाऱ्यांना १८० रुपये दंड केला जातो. ही रक्कम पूर्वीच निश्चित केली होती. अशा प्रकारांना आळा बसावा, यासाठी अशा प्रकरणात प्रत्येकी ५०० रुपये दंड आकारण्यात यावा, असा प्रस्ताव महापालिका प्रशासनाने तयार केला आहे. शासनाच्या मान्यतेनंतर सुधारित दंड आकारला जाईल.
