पुणे : भारती हॉस्पिटलमध्ये ५७ वर्षीय रुग्ण मेंदूत रक्तस्राव झाल्याने मेंदूमृत अवस्थेत होता. या रुग्णाच्या नातेवाईकांनी डॉक्टरांच्या आवाहनाला प्रतिसाद देत अवयवदानास मान्यता दिली. कुटुंबीयांनी वेळीच घेतलेल्या योग्य निर्णयामुळे या व्यक्तीची दोन्ही मूत्रपिंडे, यकृत आणि नेत्रपटलाचे दान करण्यात आले. दोन्ही मूत्रपिंडे आणि यकृताचे प्रत्यारोपण तीन जणांना करण्यात आले. एका निर्णयामुळे तिघांना नवजीवन मिळाले.
भारती हॉस्पिटलमधील वैद्यकीय सामाजिक विभाग, केरळी चॅरिटेबल फाउंडेशन, पुणे आणि आंतरराष्ट्रीय मानवता आयोगाच्या पथकाने रुग्णाच्या नातेवाइकांचे समुपदेशन केले. त्यानंतर विभागीय प्रत्यारोपण समन्वय समितीच्या समन्वयक आरती गोखले यांना कळविण्यात आले. त्यांनी तातडीने इतर रुग्णालयांशी समन्वय साधून अवयवदानाची प्रक्रिया पूर्ण केली.
या रुग्णाचे एक मूत्रपिंड भारती हॉस्पिटलमधील रुग्णाला देण्यात आले, तर दुसरे मूत्रपिंड नाशिकमधील अपोलो हॉस्पिटल येथील रुग्णाला देण्यात आले. रुग्णाचे यकृत बाणेरमधील ज्युपिटर हॉस्पिटल येथील रुग्णाला देण्यात आले. रुग्णाच्या डोळ्यांतील नेत्रपटल भारती हॉस्पिटल नेत्रपेढीत ठेवण्यात आले आहे. या नेत्रपटलामुळे एखादा अंध जग पाहू शकणार आहे. आरोग्य विज्ञान विभागाच्या संचालिका डॉ. अस्मिता जगताप, वैद्यकीय संचालक डॉ. संजय ललवानी, उपसंचालक डॉ. जितेंद्र ओसवाल यांनी यात मार्गदर्शन केले.
