दीपक खिलारे
इंदापूर : महाराष्ट्र राज्य डेअरी असोसिएशनच्या अध्यक्षपदी बेलवाडी (ता. इंदापूर) येथील शहाजी धोंडिबा शिंदे यांची निवड झाली आहे. या निवडीबद्दल माजी मंत्री व भाजप नेते हर्षवर्धन पाटील यांनी इंदापूर येथे मंगळवारी (ता. १९) शिंदे यांचा सत्कार केला.
शहाजी शिंदे हे इंदापूर येथील दूधगंगा सहकारी दूध संघाचे माजी अध्यक्ष आहेत. डेअरी असोसिएशनच्या पुण्यात १२ डिसेंबर रोजी झालेल्या बैठकीत शहाजीराव शिंदे यांची अध्यक्षपदी निवड करण्यात आली. शिंदे यांच्या आजवरच्या अनुभवाचा फायदा निश्चितपणे दुग्ध व्यवसायाला होईल, असे हर्षवर्धन पाटील यांनी या वेळी सांगितले.
या वेळी इंदापूर तालुका भाजपचे अध्यक्ष अॅड. शरद जामदार, सहकार महर्षी शंकरराव मोहिते पाटील कारखान्याचे माजी उपाध्यक्ष सुरेश मेहेर, विजय पवार, संजय पवार, अरविंद जाधव आदी मान्यवर उपस्थित होते.
