पुणे: गेल्या काही दिवसांपूर्वी ठोंबरे विरुद्ध चाकणकर (Rupali Thombre) हा वाद चांगलाच (Rupali Chakankar) पेटला होता. या वादाने महाराष्ट्राच्या (Ajit Pawar) राजकारणात चांगलीच खळबळ माजवली आणि अनेक चर्चांना उधाण आलं होत. फलटणच्या महिला डॉक्टर आत्महत्या प्रकरणी राज्य महिला आयोगाच्या अध्यक्षा रुपाली चाकणकर यांनी एक वक्तव्य केलं होत आणि त्या वक्तव्याविरोधात रुपाली ठोंबरे यांनी विविध माध्यमांवर आपली भूमिका मांडली. त्यांच्या याच भूमिकेमुळे राष्ट्रवादी (अजित पवार गट) च्या प्रवक्तेपदावरून त्यांची हकालपट्टी करण्यात आली होती.
हा धक्का पचवत असतांनाच आता अजित पवार गटाने रुपाली ठोंबरेंना आणखी एक धक्का दिला आहे. त्यांना आता पुन्हा एकदा गटाच्या महत्वाच्या जबाबदारीमधून डावलण्यात आलं आहे तर त्या जागी रुपाली चाकणकरांना संधी देण्यात आली आहे. आगामी नगरपरिषद आणि नगरपंचायत निवडणुकांसाठी सर्वच पक्षांची जोमाने तयारी सुरु असतांनाच राष्ट्रवादी (अजित पवार गट) ने त्यांची ४० स्टार प्रचारकांची यादी नुकतीच जाहीर केली. प्रदेशाध्यक्ष आणि खासदार सुनिल तटकरे यांनी ही यादी जाहीर केली असून या यादीमधून ठोंबरेंना जाणीवपूर्वक वगळल्याच्या चर्चा सध्या राजकीय वर्तुळात सुरु आहेत. विशेष बाब म्हणजे रुपाली ठोंबरेंच्या जागी महिला आयोगाच्या अध्यक्ष रुपाली चाकणकरांना ते स्थान देण्यात आलं आहे.
रुपाली ठोंबरेंना डावलण्याची ही अजित पवार गटाची दुसरी वेळ असल्यामुळे ऐन निवडणुकीच्या तोंडावर अजित पवार गटात ‘सगळं आलबेल’ नसल्याच्या चर्चा सुरु आहेत. काही दिवसांपूर्वी रुपाली ठोंबरे आणि अमोल मिटकरींना पक्षाच्या प्रवक्तेपदावरून हटवल्याने चर्चा सुरु होत्या तर पक्षाकडून रुपाली ठोंबरेंना काही सूचक सूचना देण्यात आल्याचंही सांगितलं जात होतं.
तटकरे यांनी जाहीर केलेल्या यादीत अनेक स्टार प्रचारकांच्या समावेश आहे. तसेच अनेक प्रभावशाली आणि वरिष्ठ नेत्यांना स्थान देण्यात आलं आहे. राष्ट्रवादीचे राष्ट्रीय अध्यक्ष आणि उपमुख्यमंत्री अजित पवार, राष्ट्रीय कार्याध्यक्ष प्रफुल पटेल, प्रदेशाध्यक्ष सुनिल तटकरे, तसेच मंत्री हसन मुश्रीफ, धनंजय मुंडे, नरहरी झिरवाळ, माणिकराव कोकाटे, बाबासाहेब पाटील, मकरंद पाटील, दत्तात्रय भरणे, विधानसभा उपाध्यक्ष अण्णा बनसोडे, महिला व बालविकास मंत्री अदिती तटकरे, पर्यटन राज्यमंत्री इंद्रनील नाईक यांच्यासह अनेक वरिष्ठ नेत्यांचा समावेश आहे.
यादीत नवाब मलिक, धर्मराव आत्राम, अनिल पाटील, संजय बनसोडे, प्रताप पाटील-चिखलीकर, अमोल मिटकरी, सना मलिक-शेख, समीर भुजबळ, इद्रीस नायकवडी, झिशान सिद्दीकी, राजेंद्र जैन, सिद्धार्थ कांबळे, सुरज चव्हाण, कल्याण आखाडे, सुनिल मगरे, नाझेर काझी, महेश शिंदे, राजलक्ष्मी भोसले, सुरेखा ठाकरे, नजीब मुल्ला, प्रतिभा शिंदे, विकास पासलकर यांचाही समावेश करण्यात आला आहे.
