Pune : “ताई, माई, अक्का पक्का विचार करा… आला रे आला, आपला माणूस आला…” अशा घोषणा देत प्रचाराचा माहोल रंगात आला असतानाच, कर्वेनगरमधल्या एका सोसायटीत मात्र उमेदवाराला गेटवरच थांबावं लागलं. प्रचारासाठी आलेल्या उमेदवार आणि कार्यकर्त्यांना सोसायटीच्या वॉचमनने थेट प्रवेश नाकारल्याने वादाला सुरुवात झाली आणि हे प्रकरण थेट पोलिस चौकीपर्यंत जाऊन पोहोचलं.
महापालिका निवडणुकीच्या पार्श्वभूमीवर सध्या उमेदवार आणि त्यांचे कार्यकर्ते घरोघरी फिरून प्रचार करत आहेत. पण काही भागांत प्रचार करताना त्यांना अडथळ्यांना सामोरं जावं लागतंय. कर्वेनगर-हिंगणे होम कॉलनी प्रभागात जिजाई गार्डन परिसरातील एका सोसायटीतच प्रचाराला बंदी घालण्यात आली होती. या सोसायटीत आलेल्या एका उमेदवाराला आणि त्याच्या समर्थकांना वॉचमनने अडवून,
“कोणालाही आत प्रवेश नाही,” असं स्पष्ट सांगितलं. यावरून दोन्ही बाजूंमध्ये शाब्दिक वाद झाला.
प्रचारकर्त्यांनी सोसायटीच्या सेक्रेटरीशी बोलण्याचा प्रयत्न केला, पण सेक्रेटरीचा नंबरही देण्यात आला नाही, त्यामुळे तणाव आणखी वाढला. अखेर उमेदवाराने पोलिसांच्या 112 हेल्पलाईनवर फोन करून मदत मागितली.
माहिती मिळताच पोलिस घटनास्थळी पोहोचले. परिस्थिती पाहिल्यानंतर पोलिसांनी उमेदवाराला सांगितलं की,
“जर सोसायटीनेच असा निर्णय घेतला असेल, तर आम्ही फारसं काही करू शकत नाही.” तरीही काही तक्रार असेल तर रामनगर पोलिस चौकीत लेखी तक्रार द्या, असा सल्ला देण्यात आला.
दरम्यान, निवडणूक प्रचाराच्या काळात अशा प्रकारचे वाद वाढताना दिसत आहेत. अनेक सोसायट्या ‘खासगी मालमत्ता’ असल्याचं कारण देत प्रचाराला मज्जाव करत आहेत. त्यामुळे प्रचाराचा हक्क आणि सोसायटीचे अंतर्गत नियम यामध्ये थेट संघर्ष निर्माण होत आहे.
घरफोडी, चोरीसारख्या घटनांच्या पार्श्वभूमीवर अनेक सोसायट्यांमध्ये सुरक्षेचे नियम कडक करण्यात आले आहेत. रहिवाशांखेरीज बाहेरच्यांना थेट प्रवेश नाकारला जातो. याच नियमांचा फटका आता उमेदवारांच्या प्रचारालाही बसत आहे.
काही सोसायट्यांमध्ये आधी परवानगी घ्यावी लागते, ठराविक वेळेतच प्रचार करता येतो, उमेदवारासोबत फक्त 1-2 कार्यकर्त्यांनाच प्रवेश दिला जातो. असं चित्र असल्याचं उमेदवारांकडून सांगण्यात येत आहे.
