पुणे : पुणे महानगर परिवहन महामंडळाने (Pune PMP Bus) प्रवासी सेवेत मोठे बदल घडवून आणण्याचा महत्त्वपूर्ण निर्णय घेतला आहे. संचलनातील (Pune News) तूट भरून काढण्यासाठी तोट्यातील बस मार्गांची फेररचना करण्यात येणार आहे. यासाठी सल्लागाराची नेमणूक करण्याचा निर्णय संचालक मंडळाच्या बैठकीत घेण्यात आला. तसेच महसूल वाढीसाठी पीएमपीच्या डेपोच्या जागांचा व्यावसायिक वापर करण्याचाही प्रस्ताव मंजूर झाला आहे. याशिवाय पीएमपी तब्बल 1,000 सीएनजी बसेस खरेदी करणार आहे. या महत्त्वाच्या बैठकीस पुणे महापालिका आयुक्त नवल किशोर राम उपस्थित होते.
सध्या पुणे, पिंपरी-चिंचवड आणि पुणे महानगर विकास प्राधिकरणाच्या (PMRDA) हद्दीत पीएमपीची बससेवा सुरू आहे. या सेवेत अनेक मार्ग सतत तोट्यात असूनही चालवले जात आहेत. त्यामुळे शहरातील या मार्गांची फेरतपासणी करून फेररचना करणे आवश्यक असल्याचे निदर्शनास आले. या संदर्भात सल्लागाराची नेमणूक करण्यात येणार आहे. तो कोणते मार्ग तोट्यात आहेत, त्या मार्गांची खरी गरज काय आहे आणि पुढे त्यांचा वापर कसा होऊ शकतो याचा सविस्तर अहवाल तयार करून पीएमपीकडे सादर करणार आहे. त्यानंतर मार्गांचे पुनर्नियोजन केले जाईल.
पीएमपीच्या उत्पन्नात वाढ करण्यासाठी बस डेपो आणि इतर मिळकतींचा व्यावसायिक वापर करण्याबाबतही संचालक मंडळाच्या बैठकीत चर्चा झाली. यासाठी देखील सल्लागार नियुक्त करण्यात येणार आहे. सुरुवातीला एका बस डेपोचा व्यावसायिक वापर कसा करता येईल याचा प्रायोगिक प्रकल्प हाती घेतला जाईल. या प्रकल्पातून मिळणाऱ्या अनुभवाच्या आधारे पुढील कार्यवाही केली जाईल, अशी माहिती आयुक्त नवल किशोर राम यांनी दिली.
प्रवाशांना अधिक चांगली व पर्यावरणपूरक सेवा मिळावी यासाठी पीएमपी 1,000 नव्या सीएनजी बसेस खरेदी करणार आहे. या बसेस टप्प्याटप्प्याने प्रवाशांच्या सेवेत दाखल केल्या जाणार आहेत. यामुळे प्रवासीसंख्या वाढण्याबरोबरच पीएमपीच्या महसूलातही वाढ होण्याची अपेक्षा व्यक्त केली जात आहे.
