प्रतिनिधी अमित मुंडीक
Pune News : लष्कर पोलीस स्टेशनच्या हद्दीत कॅम्प परिसरातील ई-स्ट्रीट रोडवरील कुमार पॅलेस येथील गाळा क्रमांक 28 मध्ये 57 वर्षीय व्यक्तीने गळफास घेऊन आत्महत्या केल्याची घटना समोर आली आहे. सादिक हुसेन कपूर (वय 57, रा. सय्यद नगर, हडपसर, पुणे) असे आत्महत्या केलेल्या व्यक्तीचे नाव असून ते रिअल इस्टेट व्यवसायात कार्यरत होते. (Pune News)
दिनांक 03 जानेवारी 2026 रोजी सायंकाळी सुमारे 6.30 वाजताच्या सुमारास घटनेची माहिती मिळताच लष्कर पोलीस स्टेशनचे अधिकारी व कर्मचारी घटनास्थळी दाखल झाले. पाहणीदरम्यान सादिक कपूर यांनी दोरीच्या सहाय्याने पंख्याला गळफास घेतल्याचे आढळून आले. घटनास्थळी सुसाईड नोटही मिळून आली आहे.
पोलिसांनी फॉरेन्सिक व्हॅन व आय-कार पाचारण करून पंचनामा केला. मृतदेह नातेवाईकांच्या उपस्थितीत खाली उतरवून पोस्टमॉर्टमसाठी ससून रुग्णालयात पाठवण्यात आला. याप्रकरणी अकस्मात मृत्यूची नोंद करण्यात आली होती.
दरम्यान, मृताचा मुलगा साजीद सादिक कपूर (वय 27) याने दिलेल्या तक्रारीनुसार, सय्यद नगर येथील प्रॉपर्टी वादातून फारुक यासीन इनामदार, अफान फारुक इनामदार, जहूर महंमद सय्यद, तनवीर इब्राहीम मनीयार व इतरांनी वारंवार 50 लाख रुपयांची मागणी करून सादिक कपूर यांना आर्थिक व मानसिक त्रास दिला आणि आत्महत्येस प्रवृत्त केल्याचा आरोप करण्यात आला आहे.
या तक्रारीवरून लष्कर पोलीस स्टेशन येथे गुन्हा रजिस्टर क्रमांक 05/2026 भारतीय न्याय संहिता कलम 108, 308(2), 3(5) अन्वये चार आरोपींविरोधात गुन्हा दाखल करण्यात आला असून, पुढील तपास वरिष्ठ पोलीस निरीक्षक लष्कर पोलीस स्टेशन करीत आहेत.
