भोर: भोर-शिरवळ मार्गावरील राजेवाडी परिसरात एका अनोळखी तरुणीचा मृतदेह आढळल्याने खळबळ उडाली आहे. रस्त्यालगतच्या झाडाझुडपांमध्ये अंदाजे 25 ते 30 वर्षांच्या महिलेचा मृतदेह संशयास्पद अवस्थेत सापडला. या घटनेची माहिती मिळताच शिरवळ पोलिसांनी घटनास्थळी धाव घेत तपास सुरू केला.
सोमवारी सायंकाळच्या सुमारास रस्त्याने प्रवास करणाऱ्या काही नागरिकांच्या हा प्रकार लक्षात आला. त्यांनी तातडीने पोलिसांना माहिती दिली. त्यानंतर पोलीस पथक घटनास्थळी पोहोचले आणि परिसराची पाहणी केली. मृतदेहाची स्थिती पाहता पोलिसांनी या घटनेचा तपास गांभीर्याने सुरू केला आहे.
मृत महिलेच्या चेहऱ्यावर तसेच शरीरावर काही जखमा आढळून आल्या आहेत. विशेष म्हणजे तिच्या अंगावर आणि कपड्यांवर मिरचीची पूड आढळल्याचे पोलिसांच्या पाहणीत समोर आले. या बाबीमुळे घटनेबाबत संशय अधिक वाढला असून, महिलेचा मृत्यू नेमका कशामुळे झाला याचा तपास केला जात आहे.
सध्या शिरवळ पोलिसांनी या घटनेची अकस्मात मृत्यू म्हणून नोंद केली आहे. मात्र मृतदेहाची परिस्थिती लक्षात घेऊन तपासाची दिशा खुनाच्या शक्यतेकडेही वळवण्यात आली आहे. हा अपघात आहे की त्यामागे घातपाताचा प्रकार आहे, हे तपास पूर्ण झाल्यानंतर स्पष्ट होणार आहे. दरम्यान, मृत महिलेची ओळख अद्याप पटलेली नाही. तिच्याबाबत माहिती मिळवण्यासाठी पोलिसांकडून परिसरातील बेपत्ता महिलांची आणि तरुणींची माहिती तपासली जात आहे.
