उरुळी कांचन, (पुणे): कोरेगाव मूळ – प्रयागधाम (Uruli Kanchan News) रस्त्यावर अज्ञात इसमांनी एका 20 वर्षीय तरुणीचा दगडाने ठेचून निर्घृण खून केला. मंगळवारी (ता. 14) रात्री आठ ते साडेआठ वाजण्याच्या सुमारास हि घटना घडली आहे. या घडलेल्या घटनेने कोरेगाव मूळ, उरुळी कांचनसह परिसरात खळबळ उडाली. अवघ्या काही मिनिटांत तरुणीच्या खुनाची माहिती मिळताच उरुळी कांचन पोलिसांनी घटनास्थळी धाव घेतली.
पूनम विनोद ठाकूर (वय -20. रा. गगन आकांक्षा सोसायटी, कोरेगाव मूळ, ता. हवेली) असे खून झालेल्या तरुणीचे नाव आहे. मृत तरुणीच्या तोंडावर दगडाने मारहाण करण्यात आली. समोर आलेल्या माहितीनुसार, तीच्या डोक्यातही मोठ्या जखमा झाल्या होत्या यावेळी घटनास्थळी रक्ताचे थारोळे साचले होते. याप्रकरणी मृत तरुणीचा भाऊ मनीष विनोद ठाकूर (वय- 23) यांनी उरुळी कांचन पोलीस ठाण्यात अज्ञात इसमाच्या विरोधात तक्रार दिली आहे.
मिळालेल्या माहितीनुसार, पूनम ठाकूर हि उरुळी कांचन येथील एका मेडिकल मध्ये कामाला जात होती. बुधवारी रात्री कोरेगाव मूळ – प्रयागधाम रस्त्यावर अज्ञात इसमांनी तीच्यावर दगडाने जोरदार हल्ला चढवला. यामध्ये तरुणीच्या तोंडावर व डोक्यात मोठ्या जखमा झाल्या होत्या. घटनेची माहिती मिळताच उरुळी कांचन पोलीस घटनास्थळी दाखल झाले. संबंधित तरुणीला उरुळी कांचन येथील सिद्धिविनायक रुग्णालयात दाखल करण्यात आले होते.
दरम्यान, उपचारापूर्वीच तिचे निधन झाल्याचे डॉक्टरांनी संगितले. यावेळी खून झालेल्या ठिकाणी पूनम वापरत असलेली पर्स, चप्पल, पाण्याची बॉटल, मोबाईल फोन अशा वस्तू आढळून आल्या आहेत. खून कोणत्या कारणामुळे झाला याची अद्याप माहिती मिळू शकली नसून घटनास्थळी पोलिसांनी पंचनामा करून आरोपींच्या शोध घेण्यासाठी पोलिसांची पथके रवाना करण्यात आली आहेत.
सदर ठिकाणी पोलीस उपाधीक्षक भाटे, स्थानिक गुन्हे शाखेचे अमित सिदपाटील, उरुळी कांचन पोलीस ठाण्याचे वरिष्ठ पोलीस निरीक्षक सचिन वांगडे, सहायक पोलीस निरीक्षक ज्ञानेश्वर बाजगिरे, पोलीस उपनिरीक्षक प्रविण कांबळे, पोलीस कर्मचारी, तसेच स्थानिक गुन्हे शाखेचे कर्मचारी मोठ्या संख्येने उपस्थित होते. सदर घटनेचा पंचनामा करण्यात आला असून घटनास्थळी ग्रामीण पोलिसांचा मोठा बंदोबस्त ठेवण्यात आला आहे.
