लोणी काळभोर, ता. २४ : पुणे सोलापूर राष्ट्रीय महामार्गावरून पायी रस्ता ओलांडताना ट्रक चालकाच्या पायावरून गाडी गेल्याची घटना घडली आहे. हि घटना लोणी काळभोर (ता. हवेली) ग्रामपंचायत हद्दीतील राजेंद्र पेट्रोलपंपासमोर १९ जून रोजी रात्री सुमारे सव्वा अकरा वाजण्याच्या सुमारास घडली आहे. या अपघातात चालक गंभीर जखमी झाले असून त्यांच्यावर पिंपरी-चिंचवड येथील डी. वाय. पाटील रुग्णालयात उपचार सुरू आहेत.
धनाजी विठ्ठल थोरबोले (वय ४५) असे जखमी झालेल्या ट्रक चालकाचे नाव आहे. याप्रकरणी त्यांचा मुलगा रोहन धनाजी थोरबोले (वय २२, रा. अंबरनाथ प्लॉटिंग, माळीमळा, लोणी काळभोर) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात दुचाकीस्वार आणि पांढऱ्या रंगाच्या किया कार चालकाविरुद्ध गुन्हा दाखलकरण्यात आला आहे.
पोलिसांनी दिलेल्या माहितीनुसार, धनाजी थोरबोले हे गेल्या चार वर्षांपासून कुंजीरवाडी येथील हटकेश्वर कंपनीत ट्रक चालक म्हणून कार्यरत आहेत. १८ जून रोजी ते कामासाठी गेले होते.१९ जून रोजी रात्रीच्या सुमारास फिर्यादी रोहन यांना त्यांचे मित्र सुमित साळवे यांनी फोन करून वडिलांचा अपघात झाल्याची माहिती दिली. त्यानंतर ते तातडीने विश्वराज रुग्णालयात पोहोचले. तेथे पोलिसांनी आणि नातेवाईकांनी दाखविलेल्या सीसीटीव्ही फुटेजमध्ये धक्कादायक प्रकार समोर आला.
कामावरून घरी परतत असताना राजेंद्र पेट्रोलपंपासमोर धनाजी थोरबोले हे पायी रस्ता ओलांडत होते. त्यावेळी मोबाईलवर बोलत असलेल्या एका अज्ञात दुचाकीस्वाराने त्यांना धडक दिली. त्यामुळे ते रस्त्यावर पडले. त्याचवेळी मागून येणाऱ्या एमएच-१३ डी-क्यू-८४६६ क्रमांकाच्या वाहनचालकाने प्रसंगावधान राखत ब्रेक लावले. मात्र, त्याच्या पाठीमागून भरधाव वेगाने आलेल्या पांढऱ्या रंगाच्या किया कारने समोरील वाहनाला जोरदार धडक दिली. या धडकेमुळे पुढील वाहन धनाजी थोरबोले यांच्या अंगावर गेल्याने त्यांचा डावा पाय फ्रॅक्चर झाला असून डोक्यालाही गंभीर दुखापत झाली आहे.
प्रकृती चिंताजनक असल्याने त्यांना पुढील उपचारासाठी डी. वाय. पाटील रुग्णालयात दाखल करण्यात आले आहे. उपचारांमुळे तक्रार दाखल करण्यास विलंब झाल्याचे फिर्यादीने नमूद केले आहे. या प्रकरणी लोणी काळभोर पोलीस ठाण्यात मोटार वाहन अधिनियम १९८८ मधील कलम ११९, १३४, १७७, १८४ तसेच भारतीय न्याय संहिता (बीएनएस) २०२३ मधील कलम १२५ (ब) व २८१ अन्वये गुन्हा दाखल करण्यात आला असून पुढील तपास सुरू आहे.
