मोहोळ : देवदर्शनासाठी निघालेल्या भारंबे कुटुंबावर काळाने घाला घातला आहे. सोलापूर-पुणे राष्ट्रीय महामार्गावर उभ्या असलेल्या कंटेनरला कारने मागून जोरदार धडक दिल्याने भीषण अपघात झाला. या दुर्घटनेत एकाच कुटुंबातील 4 जणांचा मृत्यू झाला असून एक जण गंभीर जखमी झाला आहे. शुक्रवारी (6 नोव्हेंबर) दुपारी सुमारे 2.30 वाजता मोहोळ तालुक्यातील तेलंगवाडी शिवारात डोंगरे वस्ती परिसरात ही घटना घडली.
या अपघातात विलास भारंबे (66), शोभा भारंबे (63), पूनम भारंबे (38) आणि पार्थ भारंबे (8) यांचा मृत्यू झाला आहे. तर तुषार भारंबे (40) हे जखमी झाले आहेत. सर्वजण कल्याण येथील रहिवासी होते. जखमी तुषार यांना उपचारासाठी सोलापूर येथील शासकीय रुग्णालयात दाखल करण्यात आले आहे.
देवदर्शनासाठी जाताना काळाचा घाला
मिळालेल्या माहितीनुसार, भारंबे कुटुंबीय कारमधून अक्कलकोट आणि तुळजापूर येथे देवदर्शनासाठी निघाले होते. त्यांची कार तेलंगवाडी परिसरातून जात असताना रस्त्याच्या बाजूला मुरूम साईडपट्टीवर उभ्या असलेल्या कंटेनरला पाठीमागून धडकली. धडक इतकी जोरदार होती की कारमधील तिघांचा घटनास्थळीच मृत्यू झाला. जखमी झालेल्या पूनम भारंबे यांचा रुग्णालयात उपचार सुरू असताना मृत्यू झाला.
पोलिसांकडून घटनास्थळाची पाहणी
अपघाताची माहिती मिळताच अपर पोलीस अधीक्षक विजय कबाडे आणि मोहोळ पोलीस ठाण्याचे निरीक्षक दीपक पाटील यांनी घटनास्थळी भेट दिली. पोलिसांनी अपघातग्रस्त वाहनांची पाहणी करून पुढील तपासासाठी सूचना दिल्या.
या दुर्घटनेमुळे महामार्गावरील वाहतूक काही काळ विस्कळीत झाली होती. मात्र पोलिसांनी परिस्थिती नियंत्रणात आणत वाहतूक पुन्हा सुरू केली. दिवाळी आणि सलग सुट्ट्यांमुळे महामार्गावर वाहनांची संख्या वाढली आहे. त्यामुळे चालकांनी वेगावर नियंत्रण ठेवून वाहतुकीचे नियम पाळावेत, असे आवाहन पोलिसांनी केले आहे. या प्रकरणाचा पुढील तपास मोहोळ पोलीस करत आहेत.
