लोणी काळभोर, ता. 14: ओव्हरटेक करण्याच्या नादात दोन ट्रक व कारचा अपघात झाल्याची घटना घडली होती. ही घटना थेऊर (ता. हवेली) ग्रामपंचायत हद्दीतील गणेश वाडी परिसरात 7 फेब्रुवारीला पहाटे साडेतीन वाजण्याच्या सुमारास घडली होती. या अपघातात कारमधील तिघेजण जखमी झाले होते. या जखमींपैकी एका 15 वर्षाच्या मुलाचा ससून रुग्णालयात उपचारादरम्यान शुक्रवारी (ता.13) रात्री आठ वाजण्याच्या सुमारास मृत्यू झाला आहे. (Theur News)
विर राहुल सावंत (वय- 15) असे मृत्यू झालेल्या मुलाचे नाव आहे. तर या अपघातात यश अजित सावंत (वय 20) व महेश बसवराज पुजारी (वय 22, रा. चव्हाण वस्ती, थेऊर) हे किरकोळ जखमी झाले होते. याप्रकरणी महेश पुजारी यांनी लोणी काळभोर पोलीस ठाण्यात फिर्याद दिली आहे. त्यानुसार गोटु कचरु वारे (वय 23, पांगरी मारुतीची ता शिरुर जि बिड) व मोहसीन लालामियाँ सय्यद (वय- 46, पत्ता स्टार फंक्शन हॉलजवळ, हुमनाबाद जि बिदर राज्य कर्नाटक) या दोन चालकांवर गुन्हा दाखल करण्यात आला आहे.
पोलिसांनी दिलेल्या माहितीनुसार, महेश पुजारी हे त्याच्या मालकाच्या ह्युंडाई वेरणा कारने मित्र यश सावंत आणि वीर सावंत यांच्यासह थेऊर फाट्याकडे जात होते. त्यावेळी समोरून येणारी अशोक लेलंड कंपनीची 16 टायर ट्रक रस्त्याच्या मधोमध धावत होती. वारंवार अप्पर-डिप्पर देऊनही ट्रकचालकाने दुर्लक्ष केले.
याच क्षणी मागून येणाऱ्या सहा टायर ट्रकने ओव्हरटेक करण्याचा प्रयत्न केला आणि त्या ट्रकचा मागील भाग थेट वर्ना कारला धडकला. धडकेनंतर कार गोल फिरत रस्त्यालगतच्या झाडावर आदळून खड्ड्यात कोसळली. कारचे चारही टायर व संपूर्ण बॉडीचे मोठे नुकसान झाले.
दरम्यान, या अपघातात महेश पुजारी यांना किरकोळ दुखापत झाली, तर मागील सीटवर बसलेल्या वीर सावंतच्या डोक्याला गंभीर मार लागला होता. स्थानिक नागरिकांनी तात्काळ मदत करत वीरला लोणी काळभोर येथील खासगी रुग्णालयात दाखल केले, मात्र पुढील उपचारासाठी ससून रुग्णालय येथे हलविण्यात आलेल्या वीरचा शुक्रवारी (ता. 13) रात्री आठ वाजण्याच्या सुमारास उपचारादरम्यान मृत्यू झाला.
दरम्यान, या हृदयद्रावक घटनेमुळे थेऊर परिसरात हळहळ व्यक्त होत असून, अवजड वाहनांच्या बेफिकीर वाहतुकीवर कठोर कारवाईची मागणी नागरिकांकडून केली जात आहे.
