उरुळी कांचन, : शेतकरी हा अर्थव्यवस्थेचा कणा आहे कारण तो अन्नपुरवठा, कच्चा माल आणि रोजगार यांचा मुख्य स्रोत आहे, जो देशाच्या अन्नसुरक्षेचा पाया रचतो आणि ग्रामीण अर्थव्यवस्थेला चालना देतो, ज्यामुळे शेतीचा विकास आणि शेतकऱ्यांचे कल्याण देशाच्या प्रगतीसाठी आवश्यक आहे. त्यामुळे शेतकऱ्यांच्या आरोग्यासाठी एक पाऊल, बळीराजाच्या आरोग्यासाठी या उपक्रमांतर्गत तपासण्या व मोफत औषधोपचार करण्यात येणार आहेत. या शिबिराचा सर्व नागरिकांनी लाभ घ्यावा. असे आवाहन पुणे कृषि उत्पन्न बाजार समितीचे संचालक सुदर्शन चौधरी यांनी सांगितले आहे.
सोरतापवाडी (ता. हवेली) येथे एक पाऊल, बळीराजाच्या आरोग्यासाठी या शिबिराचे आयोजन शनिवारी (ता. 3) करण्यात आले आहे. या शिबिराचे आयोजन शेतकरी वर्गाच्या हितासाठी कायम प्रयत्नशील असलेल्या पुणे कृषि उत्पन्न बाजार समितीच्या माध्यमातून करण्यात आले आहे.
या महाआरोग्य शिबिरात रुबी हॉल क्लिनिक,जहांगीर हॉस्पिटल ,सह्याद्री हॉस्पिटल,संचेती हॉस्पिटल, दिनानाथ मंगेशकर हॉस्पिटल,पूना हॉस्पिटल, औंध जिल्हा रुग्णालय,ससून हॉस्पिटल,आदित्य बिर्ला हॉस्पिटल, पुणे,एच. व्ही. देसाई आय हॉस्पिटल,भारती हॉस्पिटल,डॉ. डी. वाय.पाटील मेडिकल कॉलेज,सौ. काशीबाई नवले हॉस्पिटल आणि इतर 25 नामांकित हॉस्पिटल्स सहभागी होणार आहेत. या शिबिरात तपासणी ते शस्त्रक्रिया सर्व काही विनामूल्य केले जाणार आहे.
यामध्ये मोतीबिंदू शस्त्रक्रिया,किडनी ट्रान्सप्लांट,खुबा प्रत्यारोपण,गुडगा प्रत्यारोपण,कँसर शस्त्रक्रिया,लहान मुलांच्या हृदयातील छिद्र,मेंदूची शस्त्रक्रिया,हृदयाची शस्त्रक्रिया,लिव्हर ट्रान्सप्लांट,मणक्याची शस्त्रक्रिया,अस्थिरोग तपासणी व शस्त्रक्रिया,हृदयरोग तपासणी व शस्त्रक्रिया,मूत्ररोग तपासणी व शस्त्रक्रिया,जनरल तपासणी व शस्त्रक्रिया,सांधे व खुबा प्रत्यारोपण तपासणी व शस्त्रक्रिया,मेंदू व मणके विकार तपासणी व शस्त्रक्रिया,रक्तविकार तपासणी व शस्त्रक्रिया,कान-नाक-घसा तपासणी व शस्त्रक्रिया, बालरोग तपासणी व शस्त्रक्रिया होणार आहे.
त्याच्याबरोबर किडनी व लिव्हर प्रत्यारोपण तपासणी व शस्त्रक्रिया,स्त्री रोग तपासणी व शस्त्रक्रिया,नेत्र तपासणी व मोतीबिंदू शस्त्रक्रिया,तसेच मोफत चष्मे वाटप,दंतरोग तपासणी व उपचार,मोफत डायलेसिस, मोफत मॅमोग्राफी,मोफत एक्स रे,पोटविकार (गॅस्ट्रो)तपासणी), टू डी इको, एमआयआर , सिटी स्कॅन, सोनोग्राफी,या सर्व महागड्या तपासन्या आणि सहभागी रुग्णांच्या सर्व रक्त चाचण्या मोफत करण्यात येतील. तसेच दिव्यांगांसाठी मोफत आधुनिक कृत्रिम मॉड्युलर पाय आणि हात व कॅलिपर्स वाटपासाठी तपासणी शिबीरदेखील होणार आहे. अशी माहिती सुदर्शन चौधरी यांनी दिली आहे.
