शिरूर: कायद्याचे रक्षकच गुन्हेगारांच्या जाळ्यात असून शिरूर (Shirur News) तालुक्यात सध्या अशाच एका प्रकरणाने खळबळ उडवून दिली आहे. ‘विश्वासार्ह भिसी’ योजनेच्या नावाखाली एका महिलेने चक्क पोलीस अधिकारी आणि कर्मचाऱ्यांनाच लाखो रुपयांचा गंडा घातला असून, या फसवणुकीचा आकडा कोटींच्या घरात जाण्याची शक्यता आहे.
काही महिन्यांपूर्वी शिरूरमधील एका महिलेने स्थानिक पोलीस कर्मचाऱ्यांशी जवळीक साधून एक ‘प्रायव्हेट भिसी’ योजना सुरू केली. सुरुवातीला काही पोलिसांना वेळेवर परतावा देऊन तिने मोठी विश्वासार्हता निर्माण केली. पोलीस दलात ही चर्चा इतकी पसरली की, केवळ शिपाईच नाही तर पोलीस उपनिरीक्षक आणि पोलीस निरीक्षकांनीही यात पैसे गुंतवले. काहींनी स्वतःची बचत, तर काहींनी चक्क कर्ज काढून या योजनेत रक्कम भरली.
सुरुवातीला सुरळीत चाललेला हा व्यवहार अचानक थांबला. नियमित हप्ते भरूनही जेव्हा परताव्याची वेळ आली, तेव्हा संबंधित महिलेने टाळाटाळ सुरू केली. आता पैसे बुडाल्याचे लक्षात येताच पोलीस दलात मोठी कुजबुज सुरू आहे, पण कुणीही उघडपणे बोलायला तयार नाही.
या प्रकरणात अनेक पोलीस कर्मचारी मौन बाळगून आहेत. “पोलीस असूनही आमची फसवणूक झाली” हे सांगताना होणारी नाचक्की आणि कायदेशीर पुराव्यांचा अभाव यामुळे ‘खाकी’ आज हतबल झाली आहे. दरम्यान, याप्रकरणी पुढे काय कारवाई होणार ते पाहणे महत्वाचे ठरणार आहे.
