पुणे : दिवाळीच्या काळात पुणेकरांना दिलासा देण्यासाठी महापालिका प्रशासनाने गुरुवारची साप्ताहिक पाणीकपात तात्पुरती रद्द केली होती. मात्र, सण संपल्यानंतर आता पुन्हा एकदा पाणीकपात लागू करण्याचा निर्णय घेण्यात आला आहे. येत्या गुरुवारी, 19 नोव्हेंबर रोजी संपूर्ण पुणे शहराचा पाणीपुरवठा बंद ठेवण्यात येणार आहे. त्यामुळे नागरिकांनी पाण्याचा योग्य साठा करून ठेवावा आणि उपलब्ध पाण्याचा काटकसरीने वापर करावा, असे आवाहन प्रशासनाकडून करण्यात आले आहे.

एक दिवसाआड पाणीपुरवठ्याबाबत अद्याप निर्णय नाही
दिवाळीच्या निमित्ताने थांबवण्यात आलेली गुरुवारची पाणीकपात आता पुन्हा सुरू होणार आहे. दरम्यान, शहरात एक दिवसाआड पाणीपुरवठा करण्याच्या पर्यायावरही महापालिकेत चर्चा सुरू आहे. याबाबत अंतिम निर्णय घेण्यासाठी पक्षनेत्यांची बैठक होणार होती. मात्र, ही बैठक न झाल्याने पाणीपुरवठ्याच्या नवीन नियोजनावर अद्याप शिक्कामोर्तब झालेले नाही.
आता 19 नोव्हेंबर रोजी होणाऱ्या बैठकीत यासंदर्भात चर्चा होण्याची शक्यता आहे. त्यामुळे आगामी काळात पुणे शहरातील पाणीपुरवठ्याचे वेळापत्रक बदलणार का, याकडे नागरिकांचे लक्ष लागले आहे.

ऑगस्ट 2027 पर्यंत पाणी पुरवण्याचे आव्हान
महापौर मंजूषा नागपुरे यांनीही पाणीबचतीचे महत्त्व अधोरेखित केले आहे. कालवा समितीच्या बैठकीत झालेल्या निर्णयानुसार पुणे शहरासाठी मंजूर करण्यात आलेले 7.5 टीएमसी पाणी ऑगस्ट 2027 पर्यंत पुरवायचे आहे. हा पाणीसाठा वाढवून मिळावा, यासाठी जलसंपदा मंत्र्यांची भेट घेणार असल्याचे महापौरांनी सांगितले.
मात्र, अतिरिक्त पाणीसाठा मिळेपर्यंत पाणी बचतीसाठी कठोर उपाययोजना कराव्या लागतील. त्यामुळे नागरिकांनी पाण्याचा अपव्यय टाळून महापालिकेला सहकार्य करणे गरजेचे आहे.






