Pune Purandar Airport: पुरंदर तालुक्यातील प्रस्तावित आंतरराष्ट्रीय विमानतळ प्रकल्पाच्या भूसंपादनाबाबत (Purandar Airport Compensation For Land Acquisition) जिल्हाधिकारी कार्यालयाने एक महत्त्वपूर्ण आणि शेतकरी-हित जपणारं पॅकेज जाहीर केलं आहे. जिल्हाधिकारी जितेंद्र डूडी यांनी भूसंपादन होणाऱ्या सात गावांतील शेतकरी प्रतिनिधींसोबत झालेल्या बैठकीत यासंबंधीच्या प्रस्तावाची माहिती दिली.
शेतकऱ्यांसाठी आकर्षक मोबदला
प्रशासनाच्या प्रस्तावानुसार, 2013 च्या भूसंपादन, पुनर्वसन आणि पुनर्वसाहत अधिनियमातील तरतुदींचा आधार घेत शेतकऱ्यांना उचित भरपाई देण्यावर भर दिला जात आहे. जिल्हाधिकारी डूडी यांनी शेतकऱ्यांच्या मागणीचा सकारात्मक विचार करून प्रतिएकर एक कोटी रुपये मोबदला मिळवून देण्यासाठी प्रयत्न केले जातील, असे आश्वासन दिले.
संपादित जमिनीवरील घर, गोठा, फळझाडे, विहिरी, बोअरवेल आणि जलवाहिन्या यांसारख्या मालमत्तेच्या मूल्याच्या दुप्पट मोबदला दिला जाणार आहे. संपादित जमिनीच्या एकूण क्षेत्राच्या 10 टक्के विकसित भूखंड शेतकऱ्यांना त्याच क्षेत्रात वाटप केला जाईल. हा भूखंड औद्योगिक, वाणिज्यिक, निवासी किंवा संमिश्र प्रयोजनासाठी वापरता येईल आणि तो किमान 100 चौरस मीटरचा असेल.
प्रकल्पग्रस्तांसाठी पुनर्वसन योजना
भूसंपादनामुळे बाधित होणाऱ्या कुटुंबांसाठी प्रशासनाने अनेक महत्त्वाचे निर्णय घेतले आहेत:
प्रकल्पबाधित घटक देण्यात येणारा लाभ
घर संपादित झालेले कुटुंब ‘एरोसिटी’ मध्ये 250 चौरस मीटरचा निवासी भूखंड
भूमिहीन होणारे प्रकल्पग्रस्त 760 दिवसांच्या किमान कृषी मजुरीइतकी रोख रक्कम
अल्पभूधारक प्रकल्पग्रस्त 500 दिवसांच्या शेती मजुरीएवढी रोख रक्कम
स्थलांतर अनुदान घर संपादन झालेल्या कुटुंबांना 40 हजार रुपये
गोठ्यासाठी अर्थसहाय्य प्रति गोठा 50 हजार रुपये
नोकरी व प्रशिक्षण प्रकल्पग्रस्त कुटुंबातील एका सदस्यास आयटीआय (ITI) मध्ये एका अभ्यासक्रमाचे प्रशिक्षण आणि पात्रतेनुसार नोकरीत प्राधान्य
जिल्हाधिकारी डूडी काय म्हणाले?
यावेळी जिल्हाधिकारी डूडी यांनी स्पष्ट केले की, “नियमांच्या चौकटीत राहून शेतकऱ्यांच्या मागण्यांचा सकारात्मक विचार करत त्यांना अधिकाधिक न्याय मिळवून देण्यासाठी प्रशासन प्रयत्नशील आहे.”
या महत्त्वाच्या आणि शेतकरी-भिमुख प्रस्तावामुळे आता पुरंदर आंतरराष्ट्रीय विमानतळ प्रकल्पाच्या भूसंपादन प्रक्रियेला गती मिळणार आहे.
