पुणे: पुणे (Pune News) रेल्वे विभागाने उपनगरीय प्रवाशांसाठी एक मोठा विस्तारीकरण प्रकल्प हाती घेतला असून, यामुळे शहराच्या रेल्वे नेटवर्कचे रूप पालटणार आहे. प्रशासनाने दिलेल्या माहितीनुसार, पुणे आणि आसपासच्या रेल्वे मार्गांवर ६० नवीन गाड्या सुरू करण्यात येणार आहेत. सध्या दररोज ११० गाड्या धावत असून, भविष्यात ही संख्या १८० पर्यंत पोहोचणार आहे. विशेषतः पुणे ते दौंड मार्गावर गाड्यांच्या फेऱ्या वाढवण्यात येणार असून, यामुळे दररोज प्रवास करणाऱ्या सुमारे ३ लाख पुणेकरांना मोठा दिलासा मिळणार आहे.
केवळ गाड्याच नाही, तर रेल्वे स्थानकांवरील पायाभूत सुविधांमध्येही मोठी सुधारणा करण्यात येणार आहे. या योजनेनुसार हडपसर, खडकी, आळंदी आणि उरुळी कांचन या स्थानकांवर ६ नवीन प्लॅटफॉर्म आणि नवीन टर्मिनलची उभारणी केली जाईल.
खडकीतील प्लॅटफॉर्मची लांबी वाढवली जाणार असल्याने लांब पल्ल्याच्या गाड्या तिथे थांबू शकतील. पुण्यातून सुटणाऱ्या गाड्यांची संख्या वाढल्यामुळे रेल्वे डब्यांमधील गर्दी कमी होईल आणि प्रवाशांचा वेळ वाचेल. या प्रकल्पामुळे शहरातील वाहतूक कोंडी कमी होण्यास मदत होणार असून, रेल्वे प्रशासन लवकरच या कामांना गती देणार आहे.
