पुणे: पुणे-सासवड रस्त्यावरून प्रवास (Pune News) करणाऱ्या प्रवाशांसाठी एक अत्यंत महत्त्वाची बातमी आहे. दिवेघाटात रस्ता रुंदीकरणाचे काम युद्धपातळीवर सुरू आहे. या कामांतर्गत डोंगर फोडण्यासाठी उद्या, मंगळवार दि. 17 फेब्रुवारी 2026 रोजी ‘ब्लास्टिंग’ (स्फोट) करण्यात येणार आहे. सुरक्षेच्या कारणास्तव या काळात दिवेघाटातील वाहतूक पूर्णपणे बंद ठेवली जाणार आहे. आळंदी ते पंढरपूर पालखी महामार्गाअंतर्गत हे काम पूर्ण केले जात आहे.
भारतीय राष्ट्रीय महामार्ग प्राधिकरणाने दिलेल्या माहितीनुसार, हे ब्लास्टिंग दुपारी करण्यात येणार आहे. त्यामुळे सकाळी 11.00 ते दुपारी 2.00 या तीन तासांच्या कालावधीत हडपसर ते दिवेघाट दरम्यानची सर्व प्रकारची वाहतूक थांबवण्यात येईल. या काळात घाटात मोठ्या प्रमाणात दगड आणि ढिगारे कोसळण्याची शक्यता असल्याने खबरदारीचा उपाय म्हणून हा निर्णय घेण्यात आला आहे.
जुना रस्ता अरुंद असल्याने दिवेघाटात अनेकदा वाहतूक कोंडी आणि अपघातांचे सत्र सुरू असते. हा मार्ग आता प्रशस्त आणि ‘फोर लेन’ केला जात आहे. हे काम वेळेत पूर्ण झाल्यास नागरिकांचा प्रवास अधिक सुखकर आणि सुरक्षित होणार आहे.
प्रवाशांसाठी महत्त्वाच्या सूचना:
-
पर्यायी मार्ग: हडपसर-सासवड प्रवासासाठी नागरिक बोपदेव घाट किंवा हडपसर-लोणी काळभोर-उरुळी कांचन-जेजुरी या पर्यायी मार्गांचा वापर करू शकतात.
-
वेळेचे नियोजन: ब्लास्टिंगच्या कामामुळे दुपारी २ नंतरही काही काळ वाहतूक संथ राहण्याची शक्यता आहे. त्यामुळे शक्य असल्यास सकाळी 11 च्या आधी किंवा दुपारी 3 नंतर प्रवासाचे नियोजन करावे.
प्रशासनाकडून होत असलेल्या या विकासकामात नागरिकांनी सहकार्य करावे, असे आवाहन पुणे शहर वाहतूक शाखेच्या वतीने करण्यात आले आहे.
