पुणे: राज्यात (Pune News) होणाऱ्या आगामी महानगरपालिका निवडणुकांसाठी निवडणूक आयोगाने तारखांची घोषणा केली असून, १५ जानेवारी रोजी मुंबई आणि पुण्यासह २९ शहरांमध्ये मतदान पार पडणार आहे. निवडणुकीचे रणशिंग फुंकले गेल्यामुळे सर्वच राजकीय पक्षांनी हालचाली तीव्र केल्या आहेत. पुण्यात भाजपला सत्तेपासून दूर ठेवण्यासाठी महाविकास आघाडीमध्ये नव्या समीकरणांची चर्चा रंगली असून, शरद पवार आणि अजित पवार हे दोन्ही गट एकत्र निवडणूक लढवण्याची शक्यता आहे.
राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे यांनी या संदर्भात महत्त्वाचे विधान केले आहे. पुण्यात भाजपला रोखण्यासाठी सर्व समविचारी पक्षांना सोबत घेऊन एक भक्कम आघाडी करण्याचा प्रस्ताव तयार केला जात आहे. यामध्ये उद्धव ठाकरे यांची शिवसेना आणि अजित पवार गट यांनाही सोबत घेण्याबाबत विचार सुरू आहे. दरम्यान, असे झाले तर पुण्यातील राजकारणाचे संपूर्ण चित्र पालटू शकते. अजित पवार गटाचे शहराध्यक्ष सुभाष जगताप यांनी देखील या आघाडीबाबत सकारात्मक संकेत दिले असून, २५ किंवा २६ तारखेला यासंदर्भात मोठी घोषणा होऊ शकते, असे त्यांनी म्हटले आहे.
मात्र, या संभाव्य युतीला राष्ट्रवादी शरद पवार गटाचे पुणे शहराध्यक्ष प्रशांत जगताप यांनी कडाडून विरोध केला आहे. जर दोन्ही राष्ट्रवादी एकत्र येणार असतील, तर मी माझ्या पदाचा आणि पक्षाचा राजीनामा देण्यास तयार आहे, अशी रोखठोक भूमिका त्यांनी घेतली आहे. दरम्यान, राजकीय वर्तुळात नेमकं काय घडणार? याकडे सर्वांचे लक्ष लागले आहे.
