दौंड, ता. 23 : जुन्या वादाच्या कारणावरून चौघांनी दोघा भावांवर बिअरच्या बाटलीने हल्ला करत मारहाण केल्याची घटना दौंड परिसरातील भिमनगर येथे घडली. रविवारी (ता. 21) सायंकाळी सहा वाजण्याच्या सुमारास दौंड-सिध्दटेक रोडलगत असलेल्या समाज मंदीरासमोर हि घटना घडली आहे. या प्रकरणी दौंड पोलीस ठाण्यात चौघांविरुद्ध गुन्हा दाखल करण्यात आला आहे. (Daund Crime)
सतिष सिद्राम दिवटे व सुरज सिद्राम दिवटे (दोघेही रा. रमापतीनगर, गवळीवस्ती, दौंड) अशी मारहाण झालेल्या दोघा भावांची नावे आहेत. तर आतिष सोनवणे, रितेश गायकवाड, साजन साळवे, संदेश सर्वगोड (पुर्ण नाव माहीत नाही) सर्व रा. भिमनगर, दौंड ता. दौंड) अशी मारहाण केलेल्या चौघांची नावे आहेत.
याप्रकरणी सुरज सिद्राम दिवटे यांनी दौंड पोलीस ठाण्यात तक्रार दिली आहे. त्यानुसार वरील चौघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी सुरज दिवटे व त्यांचा भाऊ सतीश सिद्राम दिवटे हे त्यांच्या दुचाकी वरून दौंड-सिद्धटेक रोडने घरी निघाले होते. घरी जात असताना भिमनगर येथील समाज मंदिरासमोर आतिष सोनवणे, रितेश गायकवाड, साजन साळवे व संदेश सर्वगोड हे थांबलेले होते.
सायंकाळी पाच वाजण्याच्या सुमारास झालेल्या वादाचा राग मनात धरून आरोपींनी फिर्यादीला शिवीगाळ व दमदाटी करत हाताने लाथाबुक्क्यांनी मारहाण केली. यावेळी आरोपी आतिष सोनवणे याने हातातील मोकळ्या बिअरच्या बाटलीने फिर्यादी सुरज दिवटे यांच्या कपाळावर वार करून दुखापत केली. तसेच आरोपी रितेश गायकवाड याने सतीश दिवटे यांच्या कपाळाच्या डाव्या बाजूस बिअरची बाटली मारून जखमी केले. याचवेळी आरोपींनी दुचाकीवर दगड मारून वाहनाचे नुकसान केले असल्याचे फिर्यादीत नमूद करण्यात आले आहे.
दरम्यान, या प्रकरणी दौंड पोलीस ठाण्यात 782/2025 अन्वये भारतीय न्याय संहिता कलम 118(1), 115(2), 352, 351(2), 3(5) अंतर्गत गुन्हा दाखल करण्यात आला आहे. पुढील तपास पोलीस हवालदार शिंदे करीत आहेत.
