Pune Hotel Shut Down : पुणे : पुणे शहरात सध्या एक वेगळेच संकट निर्माण झाले असून येथील प्रसिद्ध खाद्यपदार्थ आणि हॉटेल्सवर टाळे लागण्याची भीती व्यक्त केली जात आहे. ढोकळा, पुडाची वडी, कचोरी आणि समोसा यांसारख्या चविष्ट पदार्थांसाठी ओळखल्या जाणाऱ्या पुण्यात आता गॅसचा मोठा तुटवडा जाणवत आहे.
विशेष म्हणजे जागतिक पातळीवरील अमेरिका आणि इराण यांच्यातील युद्धाचा थेट परिणाम पुणेकरांच्या ताटापर्यंत येऊन पोहोचला आहे. या युद्धजन्य परिस्थितीमुळे इंधनाच्या पुरवठ्यावर परिणाम झाला असून पुण्यात व्यावसायिक एलपीजी गॅस सिलिंडर मिळणे कठीण झाले आहे.
शहरातील बहुतांश गॅस केंद्रांवर व्यावसायिक सिलिंडरचा साठा संपला असून नवीन पुरवठा कधी होईल याची शाश्वती नाही. ज्या हॉटेल मालकांनी आधीच साठा करून ठेवला होता त्यांचे काम सध्या सुरू आहे, मात्र इतरांना मोठी अडचण येत आहे. येत्या 2 दिवसात पुण्यातील जवळजवळ 85 टक्के हॉटेल्स बंद राहण्याची शक्यता वर्तवण्यात येत आहे. अनेक ठिकाणी गॅस नसल्यामुळे पारंपरिक पद्धतीने चुलीवर स्वयंपाक केला जात आहे, परंतु यामुळे ग्राहकांना वेळेवर सेवा देणे कठीण होत आहे. हॉटेल व्यावसायिकांना मोठ्या ऑर्डर रद्द कराव्या लागत असल्याने त्यांचे लाखो रुपयांचे नुकसान होत आहे.
पुणे जिल्ह्यात एकूण 28 लाख एलपीजी ग्राहक आहेत, ज्यापैकी 4 लाख व्यावसायिक कनेक्शन्स आहेत. सध्या घरगुती गॅसचा पुरवठा सुरळीत ठेवण्याला प्राधान्य दिले जात असले तरी व्यावसायिक वापरासाठी 1 लाख सिलिंडरचा तुटवडा निर्माण झाला आहे. ही समस्या फक्त पुण्यापुरती मर्यादित नसून लोणावळा आणि पिंपरी चिंचवडमध्येही पसरली आहे. पिंपरी चिंचवडमधील साडेसात हजार लघुउद्योगांना या टंचाईची झळ बसली असून अनेक कंपन्यांकडे केवळ 4 ते 5 दिवस पुरेल इतकाच साठा शिल्लक आहे.
पुणे हे शिक्षणाचे आणि आयटी क्षेत्राचे मोठे केंद्र असल्याने येथे हजारो विद्यार्थी आणि नोकरदार राहतात. हे सर्व लोक जेवणासाठी बाहेरच्या हॉटेल्स किंवा पोळी भाजी केंद्रांवर अवलंबून असतात. हॉटेल्स बंद झाल्यास या लोकांच्या जेवणाचा मोठा प्रश्न निर्माण होणार आहे. सध्या तरी व्यावसायिक गॅस वितरण पूर्णपणे विस्कळीत झाल्याने सर्वसामान्यांपासून मोठ्या व्यापाऱ्यांपर्यंत सर्वांचीच चिंता वाढली आहे. ही परिस्थिती निवळण्यासाठी आता सरकारी स्तरावर काय पावले उचलली जातात, याकडे सर्वांचे लक्ष लागले आहे.
