Pune : मावळ तालुक्यातील टाकवे बुद्रूक परिसरात अन्न व औषध प्रशासनाने (FDA) आतापर्यंतची एक मोठी धडक कारवाई केली आहे. या कारवाईत तब्बल ३१ कोटी ६७ लाख रुपयांचा बेकायदा तंबाखूजन्य साठा जप्त करण्यात आला असून, यामुळे परिसरात एकच खळबळ उडाली आहे.
‘सोएक्स इंडिया’ नावाच्या कंपनीवर टाकलेल्या छाप्यात तब्बल ५ लाख ४८ हजार किलो प्रतिबंधित फ्लेवर हुक्का आणि तंबाखूजन्य साहित्य सापडले. हा सगळा साठा कायद्याने बंदी असलेला आणि मानवी आरोग्यास घातक असल्याचं FDA कडून सांगण्यात आलं आहे. या प्रकरणी पाच जणांविरोधात गुन्हा दाखल करण्यात आला आहे.
FDA च्या विशेष भरारी पथकाने गुरुवारी ही कारवाई केली. ३१ डिसेंबर रोजी ठाणे जिल्ह्यातील नार्कोली येथे दाखल झालेल्या एका गुन्ह्याचा तपास करत असताना या पथकाला टाकवे बुद्रूक येथील सोएक्स इंडिया कंपनीचा धागा लागला. त्यानंतर पथकाने थेट कंपनीवर छापा टाकला असता इतका मोठा बेकायदा साठा उघडकीस आला.
या प्रकरणात वडगाव पोलिसांनी कंपनीचा सहाय्यक व्यवस्थापक अनिल कुमार चौहान याला अटक केली असून, न्यायालयाने त्याला ८ जानेवारीपर्यंत पोलीस कोठडी सुनावली आहे. याशिवाय कंपनीचे संचालक असिफ फाजलानी आणि फैजल फाजलानी यांच्यासह सोएक्स इंडिया (मुंबई) आणि सोएक्स इंडिया (टाकवे बुद्रूक) या दोन्ही कंपन्यांविरोधातही गुन्हे दाखल करण्यात आले आहेत.
ही कारवाई भंडाऱ्याचे सहाय्यक आयुक्त यदुराज दहातोंडे आणि सोलापूरचे अन्न सुरक्षा अधिकारी मंगेश लवटे यांच्या नेतृत्वाखालील विशेष पथकाने केली. अन्न सुरक्षा अधिकारी अस्मिता जयंत टोणपे यांनी या प्रकरणी वडगाव पोलीस ठाण्यात अधिकृत तक्रार दाखल केली आहे.
मावळ परिसरात आजवर झालेली ही सर्वात मोठी FDA कारवाई मानली जात असून, बेकायदा तंबाखू व्यवसायावर मोठा आघात मानला जात आहे.
