पुणे: येवलेवाडी परिसरात दुचाकीवरून आलेल्या (Pune Crime) हल्लेखोरांनी जुन्या वादातून (Pune News) एका पादचारी तरुणाच्या डोक्यात दगड घालून निर्घृण खून केल्याची धक्कादायक घटना गुरुवारी रात्री घडली. या प्रकरणी येवलेवाडी पोलीस ठाण्यात गंभीर स्वरूपाचा गुन्हा दाखल करण्यात आला असून, पोलिसांनी अवघ्या 12 तासांत मुख्य आरोपींना ताब्यात घेतले आहे.
आकाश कृष्णा चाबूकस्वार (वय 21, रा. एकनाथ पुरम हाउसिंग सोसायटी, फुरसुंगी) असे खून झालेल्या तरुणाचे नाव आहे. याप्रकरणी आकाशच्या भावाने पोलीस ठाण्यात तक्रार दिली असल्याची माहिती वरिष्ठ पोलीस निरीक्षक अमर काळंगे यांनी दिली. पोलिसांनी आदित्य सुभाष गायकवाड, गणेश किशोर मोरे आणि कौशल्य उर्फ ऋषी जनार्दन मारे या आरोपींना ताब्यात घेतले असून, इतर आरोपींचा शोध सुरू आहे.
पोलिसांनी दिलेल्या माहितीनुसार, गुरुवारी 1 जानेवारी रोजी सायंकाळी सुमारे 7 वाजता आकाश येवलेवाडी परिसरातून पायी जात असताना दुचाकीवरून आलेल्या काही तरुणांनी त्याचा रस्ता अडवला. जुन्या वादातून त्यांनी त्याच्याशी वाद घालण्यास सुरुवात केली. वादाचे रूपांतर मारहाणीत झाले. आरोपींनी आकाशला लाथा-बुक्क्यांनी मारहाण केली आणि नंतर त्याच्या डोक्यात दगड घातला. त्यानंतर आरोपी दुचाकीवरून घटनास्थळावरून पसार झाले.
गंभीर जखमी अवस्थेत आकाशला परिसरातील नागरिकांनी तातडीने जवळच्या खासगी रुग्णालयात दाखल केले. मात्र उपचारादरम्यान त्याचा मृत्यू झाला. घटनेनंतर पोलिसांनी घटनास्थळी जाऊन पंचनामा केला.
पळून गेलेल्या आरोपींच्या शोधासाठी पोलीस उपायुक्त राजलक्ष्मी शिवलकर यांच्या आदेशानुसार तातडीने दोन विशेष तपास पथके तयार करण्यात आली. सीसीटीव्ही फुटेज आणि तांत्रिक विश्लेषणाच्या मदतीने आरोपींचा माग काढण्यात आला. ही कारवाई सहायक पोलीस निरीक्षक राकेश जाधव आणि तपास पथकातील अधिकारी व अंमलदारांनी केली. शहरात वाढत्या गुन्हेगारीच्या घटनांमुळे नागरिकांमध्ये चिंतेचे वातावरण आहे.
