पुणे : भोसरी परिसरात शनिवारी सकाळच्या सुमारास सशस्त्र घरफोडीची धक्कादायक घटना घडली. मात्र नागरिकांच्या सतर्कतेमुळे एका सराईत गुन्हेगाराला अटक करण्यात पोलिसांना यश आले आहे. या प्रकरणी भोसरी पोलीस ठाणे येथे गुन्हा क्रमांक 79/2026 नोंदवण्यात आला असून महाराष्ट्र पोलीस कायदा, भारतीय न्याय संहिता आणि आर्म अॅक्टअंतर्गत गंभीर कलमांनुसार गुन्हा दाखल करण्यात आला आहे.
सकाळी फ्लॅट फोडून चोरी
22 फेब्रुवारी 2026 रोजी सकाळी 7.15 ते 7.50 या वेळेत पीसीएमसी चिल्ड्रन पार्कजवळ, चैतन्य पार्क, साईदर्शन बी विंग, इंद्रायणीनगर, भोसरी येथे ही घटना घडली. फिर्यादी धर्मेंद्र अमरेंद्र झा (वय 53) यांच्या फ्लॅटची कडी-लॅच तोडून आरोपींनी घरात प्रवेश केला. बेडरूममधील कपाट व लॉकर उचकटून सुमारे 57,500 रुपये रोख रक्कम तसेच चांदीची नाणी चोरीस गेली.
पळून जाताना नागरिकांचा पाठलाग
घरफोडीनंतर आरोपी मोटारसायकलवरून पसार होत असताना स्थानिक नागरिकांनी त्यांचा पाठलाग केला. यावेळी आरोपी सागरसिंग सुरजसिंग ऊर्फ ‘फंटयास्टिक’ बावरी (अंधरेले), रा. गुरुगोविंद सिंगनगर, जालना आणि त्याच्या फरार साथीदाराने चाकू व पिस्तुलाचा धाक दाखवून सुटका करण्याचा प्रयत्न केला.
झटापटीदरम्यान सचिन ज्ञानेश्वर पिंगळे यांच्या हाताला चाकूचा वार लागून दुखापत झाली, तर ध्वजशेर शाही यांनाही आरोपीला पकडताना किरकोळ जखम झाली.
दुपारी अटक, साथीदार फरार
घटनेनंतर पोलिसांनी तात्काळ कारवाई करत सागरसिंग अंधरेले याला दुपारी 4.50 वाजता अटक केली. सध्या तो न्यायालयीन कोठडीत आहे. त्याचा साथीदार अद्याप फरार असून त्याच्या शोधासाठी विशेष पथके कार्यरत आहेत. फरार आरोपीकडे मॅगझीन नसलेली पिस्तुल आणि चाकू असल्याची माहिती पोलिसांनी दिली.
15 हून अधिक गुन्ह्यांची नोंद
अटक आरोपीवर जालना जिल्ह्यात घरफोडी व चोरीचे 15 हून अधिक गुन्हे दाखल असल्याचे प्राथमिक तपासात निष्पन्न झाले आहे. घटनास्थळी वरिष्ठ पोलिस अधिकाऱ्यांनी भेट देऊन पाहणी केली असून फॉरेन्सिक पथकाचीही मदत घेण्यात आली.
या प्रकरणाचा पुढील तपास पोलीस उपनिरीक्षक सुहास खाडे करत आहेत. दरम्यान, संशयास्पद हालचाली आढळल्यास तात्काळ पोलिसांना कळवावे, असे आवाहन पोलिसांनी नागरिकांना केले आहे.
