Crime News: मुंबई : मुंबईतील दहिसर पूर्वेकडील रावळपाडा परिसरातून धक्कादायक घटना समोर आली आहे. रावळपाडा येथील शनी मंदिर जवळून एक तरुण पायी जात असताना अचानक एका ड्रग्जच्या आहारी गेलेल्या व्यक्तीने त्याच्यावर चाकू आणि कात्रीने हल्ला केला. या अचानक झालेल्या हल्ल्यामुळे परिसरात भीतीचे वातावरण निर्माण झाले.
या हल्ल्यात तरुण गंभीर जखमी झाला असून चाकूचा वार खोलवर झाल्याचे सांगितले जात आहे. तसेच कात्रीने डोक्यावर वार केल्यामुळे मोठ्या प्रमाणात रक्तस्त्राव झाला. घटनेनंतर स्थानिक नागरिकांनी तत्काळ मदत करत जखमी तरुणाला जवळच्या खासगी रुग्णालयात दाखल केले. सध्या त्याच्यावर उपचार सुरू असून त्याची प्रकृती चिंताजनक असल्याची माहिती मिळत आहे.
घटनेची माहिती मिळताच मुंबई पोलीस घटनास्थळी पोहोचले आणि परिसराची पाहणी केली. पोलिसांनी या प्रकरणात हत्येच्या प्रयत्नाचा गुन्हा नोंदवला असून आरोपीचा शोध सुरू केला आहे. आरोपी हा ड्रग्जच्या नशेत असल्याचा प्राथमिक अंदाज व्यक्त करण्यात येत आहे.
या घटनेमुळे दहिसर परिसरात नागरिकांमध्ये भीतीचे वातावरण पसरले असून सार्वजनिक ठिकाणी सुरक्षा वाढवण्याची मागणी स्थानिकांकडून केली जात आहे. पोलिसांकडून पुढील तपास सुरू आहे.
