दौंड, (पुणे) : जनावरांना दाटीवाटीने भरून, चारा-पाण्याची व्यवस्था न करता तसेच पशुवैद्यकीय प्रमाणपत्राशिवाय वाहतूक केल्याप्रकरणी दौंड पोलिसांनी तिघांविरुद्ध गुन्हा दाखल केला आहे. या कारवाईत सहा जनावरे आणि महिंद्रा पिकअप वाहन असा एकूण 3 लाख 40 हजार रुपयांचा मुद्देमाल जप्त करण्यात आला.
या प्रकरणी रफिक मेहबुब शेख (वय ५३), शकु कुरेशी आणि अरबाज नझीर शेख, तिघेही रा. खाटीक गल्ली, दौंड) असे गुन्हा दाखल करण्यात आलेल्या तिघांची नवे आहेत. त्यांच्याविरुद्ध प्राण्यांना क्रूरतेने वागवण्यास प्रतिबंध अधिनियम 1960 चे कलम 11(1) तसेच भारतीय न्याय संहितेच्या संबंधित कलमांनुसार गुन्हा दाखल करण्यात आला आहे.
पोलिसांनी दिलेल्या माहितीनुसार, 26 सप्टेंबर रोजी रात्री सुमारे अकरा वाजण्याच्या सुमारास सिद्धटेक-दौंड रस्त्यालगत महादेव मंदिराजवळ महिंद्रा पिकअप (एमएच 06 बीजी 8268) मधून सहा जनावरे दाटीवाटीने वाहतूक केली जात असल्याचे आढळून आले. वाहनात जनावरांना हवा मिळण्याची पुरेशी व्यवस्था नसल्याचे तसेच चारा-पाणी व औषधोपचाराची सोय नसल्याचे पोलिसांच्या निदर्शनास आले.
पोलिसांच्या प्राथमिक तपासात सदर जनावरांची कत्तलीच्या उद्देशाने वाहतूक केली जात असल्याचा संशय व्यक्त करण्यात आला आहे. कारवाईत 80 हजार रुपये किमतीची चार मोठी जनावरे, 10 हजार रुपये किमतीची दोन लहान जनावरे आणि 2 लाख 50 हजार रुपये किमतीचे पिकअप वाहन जप्त करण्यात आले. पुढील तपास पोलीस हवालदार शिंदे करीत आहेत.
