Mulshi Accident :मुळशी : मुळशी तालुक्यातील कातरखडक गावात 20 फेब्रुवारी रोजी काळजाचा थरकाप उडवणारी घटना घडली. वाळूने भरलेल्या एका भरधाव डंपरचा ताबा सुटल्याने तो थेट रस्त्याच्या कडेला असलेल्या घरात घुसला. या दुर्दैवी अपघातात (Accident) एका महिलेचा जागीच मृत्यू झाला असून दुसरी महिला गंभीर जखमी झाली आहे. (Mulshi Accident)
मिळालेल्या माहितीनुसार, मुळशी तालुक्यात सध्या रस्त्याचे काम सुरू आहे. या कामासाठी वाळू घेऊन जाणारा डंपर कातरखडक गावातून जात होता. गावातील एका वळणावर येताच चालकाचा ताबा सुटला आणि डंपर थेट रस्त्याशेजारी असलेल्या घरावर आदळला. धडक इतकी जोरदार होती की घराची भिंत तात्काळ कोसळली आणि घरातील लोक ढिगाऱ्याखाली अडकले.
या अपघातावेळी नंदा मालपोटे वय 50 या घरात उपस्थित होत्या. भिंत कोसळल्याने त्या ढिगाऱ्याखाली अडकल्या. त्यांच्या सोबत आणखी एक महिला देखील जखमी झाली. घटनेनंतर स्थानिक नागरिकांनी तातडीने मदतकार्य सुरू केले. तसेच पौड पोलिसांना माहिती देण्यात आली. पोलिस आणि ग्रामस्थांनी मिळून दोन्ही महिलांना ढिगाऱ्यातून बाहेर काढले आणि तात्काळ रुग्णालयात दाखल केले. मात्र, नंदा मालपोटे यांना गंभीर दुखापत झाल्याने डॉक्टरांनी त्यांना मृत घोषित केले. दुसऱ्या महिलेवर उपचार सुरू आहेत.
या प्रकरणी मृत महिलेच्या मुलाने पौड पोलिस ठाण्यात तक्रार दिली आहे. पोलिसांनी डंपर चालकाविरुद्ध गुन्हा नोंदवला असून पुढील तपास सुरू आहे. गावात मोठ्या प्रमाणावर अवजड वाहनांची ये-जा होत असल्याने नागरिकांनी चिंता व्यक्त केली आहे. अशा प्रकारच्या घटना टाळण्यासाठी प्रशासनाने योग्य उपाययोजना करावी, अशी मागणी ग्रामस्थांकडून करण्यात येत आहे.
