राहुलकुमार अवचट
पुणे: रेकॉर्डवरील सराईत आरोपीस कायद्याची जरब बसवत यवत पोलिसांकडून 02 वर्षांकरिता तडीपारीची कारवाई करण्यात आली आहे. याबाबत अधिक माहिती अशी की, यवत पोलीस स्टेशन हद्दीतील सराईत आरोपी दत्ता अशोक शिंदे (वय 29 वर्षे, रा. राहू, ता. दौंड, जि. पुणे) याच्यावर एकूण 19 वेगवेगळे गंभीर गुन्हे दाखल आहेत.
सामान्य नागरिकांमध्ये दहशत निर्माण होत असल्याने कायदा व सुव्यवस्था अबाधित ठेवण्यासाठी यवत पोलीस स्टेशनच्या वतीने तडीपार करण्याबाबत प्रस्ताव दौंड उपविभागीय अधिकारी यांच्याकडे देण्यात आला होता. या प्रस्तावाची मंजुरी मिळाली असून, रेकॉर्डवरील आरोपी दत्ता अशोक शिंदे याला महाराष्ट्र पोलीस अधिनियम कलम 56(1)(ब) अन्वये 02 वर्षांकरिता पुणे जिल्हा (पुणे शहर व पिंपरी-चिंचवड हद्दीसह) व अहिल्यानगर जिल्ह्यातील कर्जत व श्रीगोंदा तालुक्यांतून तडीपार करण्यात आले आहे.
सदरची कारवाई पुणे ग्रामीणचे पोलीस अधीक्षक संदिपसिंह गिल्ल, बारामती विभागाचे अपर पोलीस अधीक्षक गणेश बिरादार, दौंड उपविभागीय पोलीस अधिकारी बापुराव दडस, पुणे ग्रामीण स्थानिक गुन्हे शाखेचे पोलीस निरीक्षक प्रमोद क्षिरसागर यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगावकर, तपास पथकाचे पोलीस उपनिरीक्षक मारोती मेतलवाड, स्थानिक गुन्हे शाखेचे सहा. फौज महेश बनकर यांसह यवत पोलीस स्टेशनचे पोलीस हवालदार संदिप देवकर, रॉकी देवकाते, महेंद्र चांदणे, धिरज जाधव, प्रतिक जगताप, अमोल भुजबळ, मारूती बाराते, सचिन गुंड, दिनेश लोणकर, विनित कुऱ्हाडे यांच्या पथकाने केली.
