लोणावळा: लोणावळ्यातील (Lonavala News) एक धक्कादायक घटना समोर आली असून लायन्स पॉईंट येथील खोल दरीमध्ये एका तरुणाचा मृतदेह आढळून आला आहे. परेश हटकर नावाचा हा ३८ वर्षीय तरुण बुधवारी सकाळपासून बेपत्ता होता. घरून कामावर जाण्यासाठी निघालेला हा तरुण रात्री उशिरापर्यंत घरी परतलाच नाही, तसेच त्याच्याशी कोणताही संपर्क होऊ शकला नव्हता. यानंतर शोध घेत असताना लोणावळ्यातील प्रसिद्ध पर्यटन स्थळावर त्याची गाडी बेवारस स्थितीत उभी असल्याचे पोलिसांना दिसून आली. स्थानिक पोलीस पाटील संतोष मरगळे यांनी याबद्दलची पूर्वसूचना दिल्यानंतर पोलिसांनी तपासचक्र फिरवले.
या प्रकरणातील तांत्रिक बाबी अत्यंत गुंतागुंतीच्या होत्या कारण परेश यांचा मोबाईल लायन्स पॉईंटवर सापडला होता, मात्र मोबाईलचे सिग्नल लोकेशन पाली परिसरात दिसत होते. हा तांत्रिक गोंधळ ओळखून 700 फूट खोल दरीत शोध घेण्याचे ठरले. श्रुती शिंदे, योगेश उंबरे आणि सचिन गायकवाड या सदस्यांनी दोरीच्या मदतीने दरीत उतरून शोधमोहीम राबवली. जवळपास 4 तासांच्या प्रयत्नानंतर या पथकाने परेश यांचा मृतदेह शोधून काढला आणि तो सुरक्षितपणे वर आणून पोलिसांच्या स्वाधीन केला.
परेश यांचा मृत्यू अपघाताने झाला की यामागे काही घातपात आहे, याचा तपास लोणावळा ग्रामीण पोलीस करत आहेत. घरून ऑफिसला जातो असे सांगून निघालेली व्यक्ती लोणावळ्यात कशी पोहोचली आणि कार रस्त्याच्या कडेला उभी करून ते दरीत पडले कसे, असे अनेक प्रश्न आता उपस्थित होत आहेत. पोलिसांनी या घटनेचा पंचनामा करून अधिक तपास सुरु आहे.
