इंदापूर, ता. 23 : अज्ञात कारणावरून पतीने पत्नीच्या डोक्यात लाकडी वस्तूने जोरदार प्रहार करून हत्या केल्याची घटना शेळगाव (ता. इंदापूर) येथील गावठाण परिसरात उघडकीस आली आहे. आज मंगळवारी (ता. 23) पहाटे हि घटना घडली आहे. या घटनेनंतर आरोपी पती फरार झाला असून पोलिसांकडून त्याचा कसून शोध सुरू आहे. (Indapur Crime)
मनीषा मल्हारी खोमणे (वय-35) असे खून झालेल्या मृत महिलेचे नाव आहे. तर मल्हारी उर्फ बापू खोमणे असे खून केलेल्या आरोपी पतीचे नाव आहे. याप्रकरणी पोलिसांनी घटनेची पाहणी केली असून पुढील कार्यवाही सुरु केली आहे.
मिळालेल्या माहितीनुसार, मंगळवारी (ता. 23) पहाटे साडेपाच ते सहाच्या सुमारास मनीषा घरात आंघोळीसाठी चुलीवर पाणी तापवत होती. याच वेळी तिचा पती मल्हारी उर्फ बापू खोमणे याने पाठीमागून येत डोक्यात लाकडी वस्तूने जोरदार प्रहार केला. या हल्ल्यात मनीषा जागीच कोसळली. मनीषा जखमी झाल्याचे व डोक्यातून रक्तस्राव होत असल्याचे दिसताच आरोपी मल्हारी हा घटनास्थळावरून फरार झाला.
गंभीर जखमी अवस्थेत तिला उपचारासाठी इंदापूर येथील उपजिल्हा रुग्णालयात दाखल करण्यात आले; मात्र डॉक्टरांनी तिला मृत घोषित केले.
घटनेची माहिती मिळताच वालचंदनगर पोलीस ठाण्याचे पोलीस निरीक्षक राजकुमार डुणगे, पोलीस उपनिरीक्षक रतिलाल चौधर, पोलीस हवालदार दादासाहेब डोईफोडे, पोलीस कर्मचारी गुलाबराव पाटील यांच्यासह पथकाने घटनास्थळी भेट देऊन पंचनामा केला.
दरम्यान, आरोपी मल्हारी उर्फ बापू खोमणे याच्यावर यापूर्वीही वालचंदनगर पोलीस ठाण्यात गंभीर स्वरूपाचे गुन्हे दाखल असल्याची माहिती पोलिसांनी दिली. त्याच्या शोधासाठी पोलिसांची पथके रवाना करण्यात आली असून पुढील तपास सुरू असल्याची माहिती पोलिसांनी दिली आहे.
