पुणे: गेल्या 6 महिन्यांपासून पोलिसांना चकवा देत फरार असलेला गंभीर गुन्ह्यातील आरोपी अखेर गुन्हे शाखेच्या हाती लागला. विशेष म्हणजे, पोलिसांपासून लपून राहणारा हा आरोपी गणेशोत्सवाच्या प्रतिष्ठापना मिरवणुकीत सहभागी होऊन बिनधास्तपणे नाचत होता. याच वेळी पोलिसांना त्याच्या उपस्थितीची माहिती मिळाली आणि गर्दीतच सापळा रचून त्याला अटक करण्यात आली.
इस्माईल इब्राहिम शेख (वय 22, रा. श्री बसवेश्वर मठाजवळ, जुनी वडारवाडी, शिवाजीनगर) असे अटक केलेल्या आरोपीचे नाव आहे. पुणे गुन्हे शाखेच्या युनिट 1 च्या पथकाने जुन्या वडारवाडी परिसरात ही कारवाई केली.
मिळालेल्या माहितीनुसार, इस्माईल शेख याच्यावर एका व्यक्तीवर तीक्ष्ण शस्त्राने जीवघेणा हल्ला केल्याचा आरोप आहे. या प्रकरणी चतुःशृंगी पोलीस ठाण्यात त्याच्याविरोधात गंभीर गुन्हा दाखल करण्यात आला होता.
दरम्यान, 14 सप्टेंबर रोजी सायंकाळी वडारवाडी परिसरात गणेशोत्सवाच्या प्रतिष्ठापना सोहळ्याची मिरवणूक सुरू होती. यावेळी इस्माईल श्री बसवेश्वर मठाजवळील मिरवणुकीत पोहोचला. काही काळ तो गर्दीत मिसळून नाचत असल्याचे पोलिसांच्या निदर्शनास आले.
गुन्हे शाखेच्या युनिट 1 मधील पोलीस अंमलदार बाबासाहेब सांगडे यांना आरोपी मिरवणुकीत असल्याची माहिती मिळाली. त्यानंतर पथकाने तातडीने घटनास्थळी पोहोचून गर्दीत त्याच्यावर लक्ष ठेवले. योग्य संधी मिळताच पोलिसांनी इस्माईलला ताब्यात घेतले.
