अमित मुंडीक
हडपसर : हडपसर पोलीस स्टेशनच्या (Hadapsar News) हद्दीत घडलेल्या खुनाच्या गुन्ह्यातील सुमारे २० महिन्यांपासून फरार असलेला आरोपीला पोलिसांनी अटक केली आहे. दि. ०५ मे २०२४ रोजी उन्नतीनगर, हडपसर (Pune Crime) येथील कॅनॉलमध्ये एक इसम बेशुद्ध अवस्थेत आढळून आला होता. उपचारासाठी ससून रुग्णालयात दाखल केले असता डॉक्टरांनी त्यास मृत घोषित केले. मृत इसमाचे नाव विनोद मधुकर शार्दुल (वय ४५, रा. दिवा ईस्ट) असे निष्पन्न झाले. (Latest Marathi News)
तपासात असे उघड झाले की, दि. ०४ मे २०२४ रोजी लक्ष्मी कॅनॉल, स्वारगेट येथे मृत इसम व त्याच्या ओळखीच्या इसमांमध्ये वाद झाला होता. या वादातून संगनमत करून मृत इसमास कॅनॉलमध्ये ढकलून जिवे ठार मारण्यात आले. याप्रकरणी हडपसर पोलीस स्टेशन गु.र.नं. ५०७/२०२५ भा.दं.वि. कलम ३०२, ३४ अन्वये गुन्हा दाखल करण्यात आला होता. घटनेनंतर आरोपी फरार झाले होते.
वरिष्ठ पोलीस निरीक्षक संजय मोगले यांच्या मार्गदर्शनाखाली पोलीस अंमलदार संदीप राठोड यांनी तांत्रिक विश्लेषणाच्या आधारे आरोपीचा ठावठिकाणा शोधून काढला. आरोपी उत्तराखंड राज्यातील हरीद्वार येथे असल्याचे निष्पन्न झाल्यानंतर, दि. २५ डिसेंबर २०२५ रोजी पोलीस पथकाने तेथे जाऊन हॉटेलबाहेर येताच वैभव मनोज जाधव (वय २४, रा. औरंगाबाद) यास ताब्यात घेतले.
ही कारवाई अपर पोलीस आयुक्त मनोज पाटील, पोलीस उप आयुक्त डॉ. सागर कवडे आणि सहाय्यक पोलीस आयुक्त अतुलकुमार नवगिरे यांच्या मार्गदर्शनाखाली पार पडली. हडपसर पोलीस स्टेशनच्या तपास पथकाने ही यशस्वी कामगिरी केली असून पुढील तपास सुरू आहे.
