अमित मुंडीक
पुणे: शेतकऱ्यांच्या जोडव्यवसायावर घाला (Pune News) घालणाऱ्या दुभत्या जनावरांच्या चोरी करणाऱ्या सराईत टोळीला अटक करण्यात पुणे ग्रामीण स्थानिक गुन्हे शाखेला (Pune Crime) मोठे यश मिळाले आहे. या कारवाईत पाच गुन्हे उघडकीस आले असून, पाच दुभती जनावरे व चोरीसाठी वापरलेले पिकअप वाहन असा एकूण ६ लाख १० हजार रुपयांचा मुद्देमाल पोलिसांनी हस्तगत केला आहे. (Latest Marathi News)
ओतूर पोलीस स्टेशन येथे दाखल गु.र.नं. ३५८/२०२५ बी.एन.एस. ३०३ (२) अन्वये दि. १२ डिसेंबर २०२५ रोजी गुन्हा दाखल करण्यात आला होता. फिर्यादी मधुकर रामजी गायकर (वय ६५, रा. आंबेगव्हाण, ता. जुन्नर) यांच्या गोठ्यातील एक म्हैस पहाटे चोरीस गेल्याची तक्रार होती.
जुन्नर उपविभागात मागील काही महिन्यांपासून ओतूर, जुन्नर व आळेफाटा परिसरात जनावर चोरीचे प्रमाण वाढले होते. शेतकरी शेतीसोबत पशुपालनावर अवलंबून असल्याने या चोरीमुळे त्यांच्या कुटुंबाच्या उपजीविकेवर मोठा परिणाम झाला होता. दूधटंचाईमुळे शेतकऱ्यांना बाहेरून दूध खरेदी करावे लागत असल्याने संतापाची भावना निर्माण झाली होती.
या गंभीर गुन्ह्यांची दखल घेत पुणे ग्रामीण पोलीस अधीक्षकांच्या सूचनेनुसार स्थानिक गुन्हे शाखेने विशेष तपास पथक स्थापन केले. तपासादरम्यान सुमारे १२० किलोमीटरपर्यंत सीसीटीव्ही फुटेज तपासण्यात आले, तसेच चोरीतील वाहन माळशेज घाटाकडे जात असल्याचे निष्पन्न झाले. गोपनीय बातमीदाराकडून मिळालेल्या माहितीनुसार दि. २४ डिसेंबर २०२५ रोजी खुची गावच्या जंगल परिसरात सापळा रचून नरेश भाऊ मोरे (वय ३९, रा. कळवड, ता. मुरबाड, जि. ठाणे) व सुरज अशोक पारधी (वय १९) यांना म्हैस विक्रीस नेत असताना अटक करण्यात आली. आरोपींकडून पाच म्हशी व पिकअप वाहन क्रमांक MH 05 DK 2761 जप्त करण्यात आले.
आरोपी नरेश मोरे याच्यावर यापूर्वीही जनावर चोरीचे एकूण ९ गुन्हे दाखल असून, दोन्ही आरोपींना न्यायालयीन कोठडी सुनावण्यात आली आहे.
दुभती जनावरे परत मिळाल्याने शेतकऱ्यांनी पोलिसांचे आभार मानत समाधान व्यक्त केले आहे.
