सासवड, ता. 21: ग्रामपंचायत राजकारणाच्या वादातून सासवड (ता. पुरंदर) येथील डॉक्टरांना मारहाण करून 5 लाख रुपयांची खंडणी मागितल्याची घटना घडली आहे. या प्रकरणी आठ जणांविरुद्ध गुन्हा दाखल करण्यात आला असून परिसरात खळबळ उडाली आहे. बुधवारी (18) सकाळी दहा वाजण्याच्या सुमारास सासवड हद्दीतील दत्तात्रय भोंगळे यांच्या बंगल्याजवळ ही घटना घडली.
सुभाष दत्तात्रय शिवतारे (वय 36, व्यवसाय डॉक्टर (जनहीतार्थ मल्टीस्पेशालीटी हॉस्पिटल कोडीत नाका सासवड हीवरे रोड) रा. सुपे खुर्द, ता. पुरंदर, जि. पुणे) असे मारहाण झालेल्या डॉक्टरांचे नाव आहे. याप्रकरणी त्यांनी दिलेल्या तक्रारीनुसार महेश मारूती राऊत, स्वप्नील सुधाकर राऊत, लोकेश महेश राऊत, अमोल नामदेव पवार, अदित्य सुनील राऊत, सचिन सुधाकर राऊत, जितेंद्र मारूती राऊत, ओम जितेंद्र राऊत सर्व रा. सुपे खुर्द ता पुरंदर) 8 जणांवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी डॉक्टर सुभाष शिवतारे हे सासवड हद्दीत दत्तात्रय भोंगळे यांच्या बंगल्याजवळून निघाले होते. यावेळी महेश राऊत हे समोरून त्यांच्या दुचाकी गाडीवरून येवुन डॉक्टरजवळ थांबले व तु माझ्या गावातील ग्रामपंचायत राजकारणाबाबत मी सांगीतलेले ऐकत नाही. तुझे करीअर खराब करतो मी दिलेला अर्ज पाठीमागे घ्यायचा असेल तर पाच लाख रूपये दे असे म्हणून खंडणी मागीतली. तसेच शिवीगाळ करून दगड मारून रस्त्यात पडलेल्या काठीने मारहाण करण्यास सुरुवात केली.
यावेळी भांडणे सोडवण्यासाठी शुभम जाधव व आकाश जाधव दोघे (रा सुपे ता. पुरंदर) हे आले असता त्यांना ही शिवीगाळ करून लाथाबुक्यांनी व दगडाने मारहाण केली त्यानंतर पोलीस स्टेशन कडे निघाले असताना भोंगळे वस्ती या ठिकाणी पाठीमागुन मोटार सायकल वरती स्वप्नील राऊत व लोकेश राऊत हे आले. यावेळी लोकेश याने आकाश जाधव याला तुम्ही भांडणात का पडला असे म्हणुन हातातील काठीणे मारहाण केली.
दरम्यान, जखमींनी उपचारासाठी रुग्णालय गाठले असता त्या ठिकाणी अमोल पवार, लोकेश राऊत, अदित्य राऊत, सचिन राऊत, जितेंद्र राऊत, ओम राऊत हे आले व त्यांनी शुभम जाधव व आकाश जाधव यांना शिवीगाळ दमदाटी हाताणे व लाथाबुक्यांनी मारहाण केल्याचे तक्रारीत नमूद आहे. या प्रकरणी आठ जणांविरुद्ध सासवड पोलीस ठाण्यात भारतीय न्याय संहिता कलम 118(2), 118(3), 189(2), 190, 191(2), 191(3), 126(2), 115(2), 352, 351(2), 351(3), 308(3) अंतर्गत गुन्हा दाखल करण्यात आला आहे.
