पिंपरी-चिंचवड: पिंपरी-चिंचवड शहराच्या हद्दीत असलेल्या मोशी कचरा डेपोमध्ये एक अत्यंत वेदनादायक आणि धक्कादायक घटना घडली आहे. येथील ‘वेस्ट टू एनर्जी’ प्रकल्पाच्या इमारतीवर अचानक कचऱ्याचा अवाढव्य डोंगर कोसळल्याने मोठी खळबळ उडाली आहे. या भीषण दुर्घटनेमुळे इमारत पूर्णपणे जमीनदोस्त झाली असून, ढिगाऱ्याखाली अनेकजण गाडले गेल्याची भीती व्यक्त केली जात आहे.
मिळालेल्या प्राथमिक माहितीनुसार, बुधवारी दुपारी 1:30 च्या सुमारास 15 ते 20 कर्मचारी काम आटोपून कपडे बदलण्यासाठी ‘चेंजिंग रूम’मध्ये गेले होते. नेमक्या याच वेळी कचऱ्याचा महाकाय ढिगारा इमारतीवर कोसळला. काही क्षणातच संपूर्ण इमारत कोसळली. या घटनेने परिसरात एकच घबराट पसरली आणि तातडीने मदतीसाठी प्रशासनाला पाचारण करण्यात आले.
माहिती मिळताच एनडीआरएफ, लष्कर, स्थानिक पोलीस आणि अग्निशमन दलाच्या पथकांनी घटनास्थळी धाव घेऊन बचावकार्य सुरू केले. रात्रभर चाललेल्या अथक प्रयत्नांनंतर आतापर्यंत 9 जणांना सुरक्षित बाहेर काढण्यात यश आले आहे. दरम्यान, एका कर्मचाऱ्याचा पाय कचऱ्याच्या ढिगाऱ्यात अशा प्रकारे अडकला होता की, त्याला बाहेर काढणे अशक्य होते. अखेर, त्या कामगाराचा प्राण वाचवण्यासाठी डॉक्टरांना आणि बचाव पथकाला घटनास्थळीच त्याचा पाय कापण्याचा अत्यंत कठीण निर्णय घ्यावा लागला.
सध्या प्रकल्पाची इमारत पूर्णपणे कचऱ्याखाली दबली गेली असून, तळमजल्यामध्ये अजूनही काही कर्मचारी अडकले असल्याची शक्यता आहे. ढिगाऱ्याखालून कोणताही आवाज किंवा प्रतिसाद मिळत नसल्याने बचाव पथकाची चिंता अधिकच वाढली आहे. तरीही, सर्व यंत्रणा युद्धपातळीवर शर्थीचे प्रयत्न करत आहेत. दरम्यान, बचावकार्य अद्यापही सुरू असून, परिस्थिती अत्यंत तणावपूर्ण आहे.
