बारामती: उपमुख्यमंत्री अजित पवार यांच्या अपघाती निधनानंतर (Baramati Politics) रिक्त झालेल्या बारामती विधानसभा मतदारसंघासाठी पोटनिवडणुकीच्या (Ajit Pawar Death) हालचाली सुरू झाल्या आहेत. या प्रक्रियेचा भाग म्हणून प्रशासनाने अंतिम मतदार यादी प्रसिद्ध केली असून बारामती मतदारसंघातील एकूण (Sunetra Pawar) मतदारसंख्या 383767 इतकी नोंदवण्यात आली आहे.
निवडणूक आयोगाच्या नियोजनानुसार 9 फेब्रुवारी 2026 रोजी या मतदारसंघाची प्रारूप मतदार यादी जाहीर करण्यात आली होती. त्यानंतर 9 फेब्रुवारी ते 25 फेब्रुवारी 2026 या कालावधीत नागरिकांकडून दावे आणि हरकती स्वीकारण्यात आल्या. प्राप्त अर्जांची छाननी करून आवश्यक त्या दुरुस्त्या केल्यानंतर 10 मार्च 2026 रोजी अंतिम मतदार यादी प्रसिद्ध करण्यात आली.
या अंतिम यादीत पुरुष मतदारांची संख्या 193496, महिला मतदारांची संख्या 190271 तर इतर मतदारांची संख्या 24 इतकी आहे. एकूण 383767 मतदार या मतदारसंघात नोंदवले गेले असून आगामी पोटनिवडणुकीसाठी ही यादी आधार मानली जाणार आहे. बारामती मतदारसंघात पोटनिवडणूक कधी जाहीर होणार याकडे राजकीय वर्तुळाचे लक्ष लागले असताना प्रशासनाने तयारीला वेग दिला आहे.
दरम्यान, या पोटनिवडणुकीसाठी राष्ट्रवादी काँग्रेसकडून उमेदवारीबाबतही हालचाली सुरू झाल्याची माहिती समोर येत आहे. अजित पवार यांच्या निधनानंतर बारामतीतील राजकीय वारसा कोण सांभाळणार याबाबत चर्चा सुरू होती. त्यात उपमुख्यमंत्री सुनेत्रा पवार या बारामती विधानसभा पोटनिवडणूक लढवण्याची शक्यता व्यक्त करण्यात येत आहे. काही दिवसांपूर्वी झालेल्या राष्ट्रवादी काँग्रेसच्या कोअर कमिटी बैठकीत या विषयावर चर्चा झाली असून पोटनिवडणूक लढवण्याबाबत एकमत झाल्याची माहिती सूत्रांकडून मिळत आहे.
तसेच ही निवडणूक शक्य असल्यास बिनविरोध करण्यावरही पक्षाचा भर असू शकतो, अशीही चर्चा राजकीय वर्तुळात सुरू आहे. बारामती हा पवार कुटुंबाचा पारंपरिक बालेकिल्ला मानला जात असल्याने या पोटनिवडणुकीकडे राज्यातील राजकीय पक्षांचे लक्ष लागले आहे. निवडणूक आयोगाकडून निवडणुकीची अधिकृत घोषणा झाल्यानंतर पुढील राजकीय समीकरणे स्पष्ट होणार आहेत.
