विशाल शिंदे
भोर : सातारा-पुणे महामार्गावर वर्वे (ता. भोर) गावच्या हद्दीत भारत पेट्रोल पंपासमोर ओव्हरटेक करताना बुलेटस्वाराचा कारला धडक दिल्याने झालेल्या अपघातात १६ वर्षीय मुलाचा मृत्यू झाला. या अपघातात दोन जण जखमी झाले असून संबंधित बुलेटस्वारालाही दुखापत झाली आहे. ही घटना २३ ऑगस्ट रोजी सकाळी साडेनऊच्या सुमारास घडली.
पोलिसांनी दिलेल्या माहितीनुसार, सुरेश ज्ञानू बाबर (वय ५०, रा. बनवडी, ता. कराड, जि. सातारा) हे आपल्या कुटुंबासह एक्सयूव्ही कारमधून सातारा ते पुणे हायवेने प्रवास करीत होते. वर्वे गावच्या हद्दीत भारत पेट्रोल पंपासमोर ते आपल्या लेनमधून जात असताना त्यांच्या शेजारील दुसऱ्या लेनमधून एक अज्ञात कार जात होती.
याचवेळी त्यांच्या पाठीमागून बुलेट मोटारसायकलवरून रोशन वसंत जगताप (वय २३, रा. गराडे, ता. पुरंदर, जि. पुणे) हा येत होता. त्याने दोन्ही वाहनांच्या मधून भरधाव वेगाने आणि निष्काळजीपणे ओव्हरटेक करण्याचा प्रयत्न केला. यावेळी त्याच्या बुलेटची कारच्या डाव्या बाजूस जोरदार धडक झाली.
या अपघातात रोहित बबलू काटकर (वय १६, रा. गराडे, ता. पुरंदर) याला गंभीर दुखापत झाली. उपचारादरम्यान अथवा अपघातानंतर त्याचा मृत्यू झाल्याचे पोलिसांनी नमूद केले आहे. तसेच अॅक्टिव्हा मोटारसायकलवरून जाणाऱ्या दोन व्यक्तींनाही किरकोळ तसेच गंभीर दुखापत झाली. अपघातात बुलेटस्वार रोशन जगताप यालाही दुखापत झाली आहे.
घटनेची माहिती मिळताच पोलिसांनी नोंद करून पुढील तपास सुरू केला. या प्रकरणी सुरेश ज्ञानू बाबर यांनी दिलेल्या फिर्यादीवरून राजगड पोलीस ठाण्यात गुन्हा दाखल करण्यात आला आहे.
अपघात नेमका कशामुळे झाला, वाहनांचा वेग किती होता तसेच अपघाताच्या वेळी सर्व संबंधित वाहनांची स्थिती काय होती, याबाबत पोलीस तपास करीत आहेत. या अपघातामुळे परिसरात हळहळ व्यक्त होत आहे.
या प्रकरणाचा तपास सहाय्यक फौजदार बर्काले करीत असून, प्रभारी अधिकारी पोलीस निरीक्षक जाधव यांच्या मार्गदर्शनाखाली पुढील तपास सुरू आहे.
