पुणे: धनकवडी परिसरात (Pune Crime) रविवारी रात्री पोलिस ठाण्यातच (Pune News) गोंधळ उडाल्याची धक्कादायक घटना घडली. भांडण करणाऱ्या दोन कुटुंबांना समजावण्यासाठी पोलिसांनी चौकीत आणले होते; मात्र तेथेही या महिलांनी पोलिसांना न जुमानता पुन्हा भांडणास सुरुवात केली. एवढेच नव्हे तर त्यांनी पोलिस चौकीतील झाडांच्या कुंड्यांची तोडफोड करत सरकारी मालमत्तेचे नुकसान केले. अखेरीस सहा जणांविरोधात गुन्हा दाखल करण्यात आला आहे.
याबाबत पोलीस हवालदार जयश्री नितीन शेळके (वय 37) यांनी सहकारनगर पोलीस ठाण्यात फिर्याद नोंदवली आहे. त्यानुसार, लता अरुण कसबे (वय 51, रा. पार्वती कुंज अपार्टमेंट, सावरकर चौक, धनकवडी), करिश्मा चेतन नेटके (वय 26, रा. नेटके कॉलनी, विकासनगर, देहु), अश्विनी अशोक शेलार (वय 42), किमया अशोक शेलार (वय 21), भुमी अशोक शेलार (वय 18) आणि वेदांत अशोक शेलार (वय 20, सर्व रा. सावरकर चौक, धनकवडी) यांच्यावर सरकारी कामात अडथळा निर्माण केल्याचा व मालमत्तेचे नुकसान केल्याचा गुन्हा दाखल करण्यात आला आहे.
घटनेचा तपशील असा की, रविवारी रात्री साधारण आठ वाजता लता कसबे या धनकवडी पोलीस चौकीत तक्रार देण्यासाठी आल्या होत्या. तक्रार नोंदवल्यानंतर त्या निघून गेल्या. काही वेळाने त्या पुन्हा चौकीत येऊन आपल्या नातीला शेजारील महिला अश्विनी शेलार व त्यांच्या मुलींकडून शिवीगाळ झाल्याची माहिती पोलिसांना दिली. त्यानंतर बीट मार्शल घटनास्थळी गेले व शेलार कुटुंबातील सदस्यांना चौकीत आणले.
दोन्ही कुटुंबांना समजावण्याचा प्रयत्न पोलिसांकडून सुरू होता. मात्र समेट घडवून आणण्याऐवजी दोन्ही गटांनी एकमेकांवर आरोप-प्रत्यारोप सुरू केले. थोड्याच वेळात महिलांनी एकमेकींवर शिवीगाळ केली आणि धक्काबुक्की सुरू केली. परिस्थिती नियंत्रणाबाहेर गेल्याने चौकीतील झाडांच्या कुंड्यांची तोडफोड करून नुकसान करण्यात आले.
या गोंधळात पोलिसांनी शेलार कुटुंबातील महिलांना एका बाजूला घेऊन शांत करण्याचा प्रयत्न केला. त्याचदरम्यान किमया शेलार हिला अचानक चक्कर येऊन ती खाली कोसळली. तिला तातडीने रुग्णालयात दाखल करण्यात आले. त्यानंतर पोलिसांनी कठोर कारवाई करत दोन्ही गटातील सहा जणांविरुद्ध भादंवीसह इतर संबंधित कलमांखाली गुन्हा नोंदवला आहे.
या घटनेमुळे धनकवडी परिसरात मोठी चर्चा रंगली आहे. पोलिसांच्या उपस्थितीतच भांडण घडल्याने नागरिकांनी आश्चर्य व्यक्त केले असून, अशा घटनांमुळे पोलिसांची कोंडी होत असल्याचे स्थानिकांमध्ये बोलले जात आहे.
