Pune Crime: पुणे : शहरात घरफोडी आणि चोऱ्यांच्या घटनांमध्ये अलीकडे मोठी वाढ झाल्याचे दिसून येत आहे. त्यामुळे नागरिकही त्रस्त झाले आहेत. अशातच वारजे माळवाडी परिसरातून तब्बल 32 लाख 50 हजार रुपयांचा मुद्देमाल चोरीला गेल्याची धक्कादायक घटना समोर आली आहे. विशेष म्हणजे ही चोरी घरातील कपाट किंवा लॉकरमधून न होता थेट एका स्टीलच्या टाकीतून करण्यात आल्याने नागरिकांमध्ये भीतीचे वातावरण निर्माण झाले आहे. (Pune Crime)
या प्रकरणी अहिरेगाव परिसरातील 65 वर्षीय व्यक्तीने वारजे माळवाडी पोलीस ठाण्यात तक्रार दाखल केली आहे. फिर्यादी हे व्यवसायाने देवऋषी असून त्यांनी आपल्या घरातील एका खोलीत ठेवलेल्या स्टीलच्या टाकीत सोन्याचे दागिने आणि रोख रक्कम सुरक्षित ठेवली होती. 2 ऑक्टोबर रोजी ही चोरी उघडकीस आली होती. मात्र सुरुवातीला फिर्यादींना आपल्याच कुटुंबातील कोणीतरी हे दागिने घेतले असावेत असा संशय होता.
घरातील अंतर्गत वादामुळे किंवा गैरसमजामुळे ही घटना घडली असावी, अशी शक्यता वाटल्याने त्यांनी तात्काळ पोलिसांत तक्रार दिली नव्हती. काही दिवसांनी सर्व बाबी तपासल्यानंतर आणि चोरी बाहेरील व्यक्तीनेच केल्याचे स्पष्ट झाल्यानंतर त्यांनी पोलिसांकडे धाव घेतली. प्राथमिक तपासात चोरट्याने घराच्या खिडकीतून आत प्रवेश करून स्टीलच्या टाकीत ठेवलेला मुद्देमाल लंपास केल्याचा संशय पोलिसांनी व्यक्त केला आहे. वरिष्ठ पोलीस निरीक्षक विश्वजीत काइंगडे यांच्या मार्गदर्शनाखाली या प्रकरणाचा तपास सुरू आहे.
शहरातील विविध भागांत होत असलेल्या या चोऱ्यांमुळे नागरिकांचा सुरक्षेचा प्रश्न ऐरणीवर आला आहे. त्यामुळे नागरिकांकडून मोठी चिंता व्यक्त केली जात आहे.
