पुणे: पुण्यातील वारजे माळवाडी परिसरात प्रेमसंबंधातील मानसिक त्रासाला कंटाळून 21 वर्षीय तरुणीने आत्महत्या केल्याची धक्कादायक घटना समोर आली आहे. या प्रकरणी मृत तरुणीच्या आईच्या तक्रारीवरून तिच्या प्रियकराविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे.
ही घटना 4 मे रोजी घडली होती. संबंधित तरुणीने राहत्या घरात गळफास घेऊन आत्महत्या केली होती. सुरुवातीला पोलिसांनी अकस्मात मृत्यूची नोंद केली होती. मात्र, पुढील चौकशीत प्रेमसंबंधातून मानसिक छळ झाल्याचा आरोप समोर आल्यानंतर गुन्हा दाखल करण्यात आला.
पोलिसांनी दिलेल्या माहितीनुसार, राज ठोंबरे (वय 23, रा. कोथरूड) याच्याविरोधात गुन्हा दाखल करण्यात आला आहे. मृत तरुणी आणि राज यांच्यात मागील दोन वर्षांपासून प्रेमसंबंध होते. काही काळ सर्व काही सुरळीत सुरू असताना राजच्या आयुष्यात दुसऱ्या तरुणीची एन्ट्री झाल्याचे समोर आले. त्यानंतर त्याने आपल्या प्रेयसीकडे दुर्लक्ष करण्यास सुरुवात केली होती.
प्रियकराच्या बदललेल्या वागणुकीबाबत तरुणीने त्याच्याकडे विचारणा केली असता दोघांमध्ये वारंवार वाद होऊ लागले. यामुळे तरुणीला मानसिक त्रास सहन करावा लागत होता. या सततच्या तणावामुळे आणि मानसिक छळामुळे तिने टोकाचे पाऊल उचलल्याचा आरोप तिच्या कुटुंबीयांनी केला आहे.
मुलीच्या मृत्यूनंतर तिच्या आईने पोलिसांकडे तक्रार दाखल केली. त्यानुसार वारजे माळवाडी पोलिसांनी राज ठोंबरे याच्याविरोधात आत्महत्येस प्रवृत्त केल्याचा गुन्हा नोंदवला आहे. या प्रकरणाचा पुढील तपास सुरू असून आरोपीचा शोध घेण्यात येत आहे. या घटनेमुळे परिसरात हळहळ व्यक्त केली जात असून तरुणांमधील नातेसंबंध, मानसिक तणाव आणि भावनिक आधाराच्या गरजेबाबत पुन्हा चर्चा सुरू झाली आहे.
