पुणे : शहरातील वाढत्या वाहतूक कोंडीवर उपाय म्हणून प्रस्तावित तीन महत्त्वाच्या रस्ते प्रकल्पांचे भूमिपूजन शनिवारी, १८ जुलै रोजी होणार आहे. मुख्यमंत्री देवेंद्र फडणवीस आणि केंद्रीय रस्ते वाहतूक व महामार्ग मंत्री नितीन गडकरी यांच्या उपस्थितीत हा कार्यक्रम गणेश कला क्रीडा मंच येथे दुपारी १.३० वाजता पार पडणार आहे. महाराष्ट्र राज्य रस्ते विकास महामंडळ (एमएसआरडीसी) याचे आयोजन करत आहे.
या कार्यक्रमात पुणे–शिरूर उन्नत महामार्ग, हडपसर–यवत उन्नत मार्ग आणि तळेगाव–चाकण–शिक्रापूर उन्नत महामार्ग या तीन मोठ्या प्रकल्पांचा शुभारंभ होणार आहे. अनेक वर्षांपासून प्रलंबित असलेल्या या प्रकल्पांना अखेर गती मिळणार असून, पुढील चार वर्षांत त्यांची कामे पूर्ण करण्याचे सरकारचे उद्दिष्ट आहे.
पुणे–शिरूर उन्नत महामार्ग हा सहा पदरी असणार असून त्याची लांबी ५३.४ किलोमीटर आहे. या प्रकल्पासाठी सुमारे ७,३०० कोटी रुपयांचा खर्च अपेक्षित आहे. या मार्गावर वाघोली येथे वनाझ–रामवाडी मेट्रो मार्गाशी जोडणारा दुमजली उड्डाणपूलही उभारला जाणार आहे. हा प्रकल्प पूर्ण झाल्यानंतर पुणे–नगर महामार्गावरील वाहतूक कोंडी मोठ्या प्रमाणात कमी होण्यास मदत होईल. तसेच अहिल्यानगर आणि छत्रपती संभाजीनगरकडे जाणारा प्रवास अधिक जलद होऊन प्रवासाचा कालावधी सुमारे दोन तास ४५ मिनिटांपर्यंत कमी होण्याची अपेक्षा आहे.
पुणे–सोलापूर राष्ट्रीय महामार्गावरील वाहतूक सुरळीत करण्यासाठी ३१.५ किलोमीटर लांबीचा हडपसर–यवत उन्नत मार्ग उभारण्यात येणार आहे. या प्रकल्पासाठी सुमारे ५ हजार कोटी रुपयांचा खर्च होणार असून, या मार्गावर वाहनांसोबतच मेट्रो मार्गाचाही समावेश करण्यात आला आहे. त्यामुळे एमएसआरडीसी आणि मेट्रो प्रशासन संयुक्तपणे या प्रकल्पाची अंमलबजावणी करणार आहेत.
तिसरा प्रकल्प तळेगाव–चाकण–शिक्रापूर उन्नत महामार्गाचा असून, मुंबई–पुणे द्रुतगती महामार्ग ते पुणे–नगर महामार्ग यांना थेट जोडणारा हा सुमारे ५३.२ किलोमीटर लांबीचा मार्ग असेल. या प्रकल्पासाठी अंदाजे ६ हजार कोटी रुपयांचा खर्च अपेक्षित आहे. हा मार्ग सुरू झाल्यानंतर शहरातील अंतर्गत वाहतूक टाळून वाहनचालकांना थेट प्रवास करता येणार आहे.
दरम्यान, सार्वजनिक बांधकाम मंत्री शिवेंद्रसिंहराजे भोसले यांनी या प्रकल्पांचा आढावा घेत संबंधित विभागांना समन्वयाने काम करण्याच्या सूचना दिल्या आहेत. तसेच प्रकल्पांची कामे सुरू झाल्यानंतर वाहतुकीचे नियोजन करण्यासाठी पुणे महानगरपालिका आणि वाहतूक पोलिसांची स्वतंत्र बैठकही घेण्यात येणार आहे.
