Pune Politics: पिंपरी-चिंचवड : पिंपरी-चिंचवड (Pimpri Chinchwad) शहरात एक धक्कादायक घटना समोर आली असून, अजित पवार यांच्या नेतृत्वाखालील राष्ट्रवादी काँग्रेस पक्षाचे उमेदवार जितेंद्र ननावरे यांच्या प्रचार कार्यालयात एका 19 वर्षीय तरुणीचा विनयभंग (Molestation) झाल्याचा आरोप आहे. ही घटना गुरुवारी 1 जानेवारी रोजी महात्मा फुले नगर परिसरात घडली. या प्रकरणी पीडित तरुणीच्या तक्रारीनंतर एमआयडीसी भोसरी पोलीस ठाण्यात वडील आणि मुलाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सिकंदर पंधारीलाल यादव, वय 38 आणि पंधारीलाल हंसराज यादव, वय 60, दोघेही रा. महात्मा फुले नगर, अशी आरोपींची नावे आहेत. गुरुवारी दुपारी हे दोघे प्रचार कार्यालयात आले होते. त्या वेळी कार्यालयात काही कार्यकर्ते आणि एक तरुणी उपस्थित होती.
आरोपींनी कार्यालयात येताच गोंधळ घालण्यास सुरुवात केली. त्यांनी तरुणीला उद्देशून शिवीगाळ केली तसेच अश्लील आणि लिंगभेद करणाऱ्या शब्दांचा वापर केला, असा आरोप तक्रारीत करण्यात आला आहे. या प्रकारामुळे तरुणीचा विनयभंग झाल्याचे नमूद करण्यात आले आहे. आरोपींच्या वागणुकीमुळे कार्यालयातील वातावरण तणावपूर्ण झाले होते.
या घटनेनंतर पीडित तरुणीने एमआयडीसी भोसरी पोलीस ठाण्यात जाऊन लेखी तक्रार दाखल केली. तिच्या जबाबाच्या आधारे पोलिसांनी दोन्ही आरोपींविरुद्ध संबंधित कलमान्वये गुन्हा दाखल केला असून, प्रकरणाचा पुढील तपास सुरू आहे.
या घटनेवर राष्ट्रवादी काँग्रेसचे उमेदवार जितेंद्र ननावरे यांनी प्रतिक्रिया दिली आहे. त्यांनी सांगितले की, ही घटना राजकीय वैमनस्यातून घडली आहे. आरोपी हे एका विशिष्ट राजकीय पक्षाशी संबंधित असून, त्यांनी जबरदस्तीने प्रचार कार्यालयात प्रवेश करून अश्लील शिवीगाळ केली. तरुणीने अधिकृत तक्रार दिली असून, कायदा आपले काम करेल, असा विश्वास त्यांनी व्यक्त केला आहे. या घटनेमुळे परिसरात खळबळ उडाली असून, राजकीय वातावरण तापले आहे.
