पुणे: पुणे महानगरपालिका (Pune Politics) निवडणुकीच्या पार्श्वभूमीवर शहराच्या (Pune Election) राजकारणात महत्त्वाची घडामोड घडली आहे. नुकताच काँग्रेस पक्षात प्रवेश केलेल्या प्रशांत जगताप (Prashant Jagtap) यांनी सोमवारी दुपारी पुणे महानगरपालिका निवडणुकीसाठी उमेदवारी अर्ज दाखल केला. काँग्रेस समर्थक आणि कार्यकर्त्यांच्या उपस्थितीत अतिशय साधेपणाने त्यांनी अर्ज भरला. प्रभाग क्रमांक 18 मधून प्रशांत जगताप यांनी निवडणूक लढवण्याचा निर्णय घेतला आहे. (Latest Marathi News)
पुणे आणि पिंपरी चिंचवड महापालिका निवडणुकीसाठी शरद पवार यांच्या राष्ट्रवादी काँग्रेसची भूमिका अजित पवार यांच्यासोबत जाण्याची असल्याचे स्पष्ट झाल्यानंतर प्रशांत जगताप यांनी चर्चेतून सन्मानाने माघार घेतली. आपल्या विचारसरणीला प्रमाण मानून त्यांनी काँग्रेस पक्षात जाहीर प्रवेश केला होता. प्रवेशाच्या वेळीच आपण महानगरपालिका निवडणूक लढवणार असल्याचे त्यांनी जाहीर केले होते. त्यानुसार त्यांनी सोमवारी अधिकृतपणे अर्ज दाखल केला.
प्रशांत जगताप यांच्या काँग्रेस प्रवेशानंतर पुण्याच्या राजकारणात आणखी एक मोठी उलथापालथ पाहायला मिळाली. माजी मंत्री बाळासाहेब शिवरकर यांचे चिरंजीव आणि माजी नगरसेवक अभिजीत शिवरकर यांनी भारतीय जनता पक्षात प्रवेश केला. शिवरकर कुटुंबाची ओळख दीर्घकाळ काँग्रेसशी निष्ठावान घराणे अशी राहिली आहे. मात्र, प्रशांत जगताप यांच्या प्रवेशानंतर प्रभाग क्रमांक 18 मधील उमेदवारीच्या शक्यता धुसर झाल्याने अभिजीत शिवरकर यांनी तत्काळ भाजपमध्ये जाण्याचा निर्णय घेतल्याचे बोलले जात आहे.
भाजपकडून अभिजीत शिवरकर यांना वानवडी भागातून उमेदवारी दिली जाण्याची शक्यता आहे. त्यामुळे प्रभाग क्रमांक 18 मध्ये प्रशांत जगताप विरुद्ध अभिजीत शिवरकर अशी थेट लढत होऊ शकते. विशेष म्हणजे हे दोघेही एकेकाळचे चांगले मित्र होते. आता त्याच मित्रांमध्ये पुणे महानगरपालिकेची लक्षवेधी आणि राजकीयदृष्ट्या महत्त्वाची लढत पाहायला मिळण्याची शक्यता जाणकार व्यक्त करत आहेत.
