पुणे : गुन्हेगारी विश्वाशी संबंधित (Pune Politics) असलेल्या आंदेकर टोळीचा म्होरक्या बंडू आंदेकर याच्या उमेदवारीमुळे पुण्यातील राजकीय वर्तुळात मोठी (Andekar Gang) खळबळ उडाली आहे. आंदेकर कुटुंबाने (Pune Ekection) उमेदवारी अर्ज दाखल केल्यानंतर ते कोणत्या पक्षाकडून निवडणूक लढवणार, याबाबत गेल्या काही दिवसांपासून चर्चा सुरू होत्या. अखेर एबी फॉर्म भरण्याच्या अंतिम दिवशी अजित पवार यांच्या राष्ट्रवादी काँग्रेस पक्षाकडून (Ajit Pawar) आंदेकर कुटुंबाला उमेदवारी देण्यात आल्याचे स्पष्ट झाले आहे. लक्ष्मी आंदेकर आणि सोनाली आंदेकर यांना राष्ट्रवादी काँग्रेसकडून एबी फॉर्म देण्यात आले आहेत. (Latest Marathi News)
नातवाच्या खुनाच्या आरोपाखाली सध्या अटकेत असलेल्या बंडू आंदेकर याने काही दिवसांपूर्वी न्यायालयात अर्ज दाखल केला होता. आपण राष्ट्रवादी काँग्रेस पक्षाकडून निवडणूक लढवू इच्छित असून, त्यासाठी उमेदवारी अर्ज भरण्याची परवानगी द्यावी, अशी मागणी त्याने केली होती. या अर्जावर सुनावणी करताना न्यायालयाने महत्त्वाचे निरीक्षण नोंदवत निवडणूक लढवणे हा नागरिकांचा मूलभूत अधिकार असल्याचे स्पष्ट केले होते. त्यामुळे बंडू आंदेकर याला काही अटी आणि शर्तींसह उमेदवारी अर्ज भरण्याची परवानगी देण्यात आली.
न्यायालयाच्या परवानगीनंतर आंदेकर कुटुंबातील सदस्यांनी पुण्यातील भवानी पेठ क्षेत्रीय कार्यालयात उमेदवारी अर्ज दाखल केले. लक्ष्मी आंदेकर, सोनाली आंदेकर आणि बंडू आंदेकर यांनी अर्ज भरले होते. अखेर अंतिम दिवशी आंदेकर यांच्या वकिलांच्या माध्यमातून एबी फॉर्म सादर करण्यात आला असून, राष्ट्रवादी काँग्रेसकडून अधिकृत उमेदवारी निश्चित झाल्याचे मानले जात आहे.
आंदेकर कुटुंबाची गुन्हेगारी पार्श्वभूमी लक्षात घेता अजित पवार गटाकडून या उमेदवारीबाबत मोठी गोपनीयता पाळण्यात आली होती. कोणतीही मोठी घोषणा न करता थेट अर्ज भरण्यावर भर देण्यात आला. मात्र, गुन्हेगारी आरोप असलेल्या व्यक्तीला सत्ताधारी पक्षाकडून पाठबळ दिल्याने पुण्यातील राजकारणात नवा वाद निर्माण होण्याची शक्यता व्यक्त केली जात आहे. या उमेदवारीवरून आगामी काळात राजकीय आरोप-प्रत्यारोप वाढण्याची चिन्हे दिसत आहेत.
