संतोष पवार
पुणे: पुणे-सोलापूर राष्ट्रीय महामार्गावर भादलवाडी (ता. इंदापूर) हद्दीत रेल्वेची चाके घेऊन जाणारा ट्रक भरधाव वेगात असताना पलटी झाल्याची घटना आज सकाळी आठ वाजण्याच्या सुमारास घडली. या अपघातानंतर महामार्ग पोलिसांनी क्रेनच्या सहाय्याने ट्रक बाजूला घेतला. सुदैवाने यात कोणतीही जीवित हानी झाली नाही.
महामार्गावर आज सकाळी ८ वाजण्या सुमारास सोलापूर दिशेने जाणाऱ्या लेनवर रेल्वेची चाके घेऊन जाणारा ट्रक (एम.एच. १३ ई.पी. ९९०२) चालक श्रीकांत गोरख लोंढे (वय -२२, रा. मु. पो. चिंचोली, ता. माढा, जि. सोलापूर) याचे गाडीवरीवल नियंत्रण सुटल्याने ट्रक रस्त्यावर पलटी झाला. या अपघातात कोणतीही जीवितहानी झाली नाही. मात्र ट्रक उलटल्यामुळे वाहतूक काही काळ विस्कळीत झाली. महामार्ग पोलिसांनी तात्काळ घटनास्थळी धाव घेत वाहतूक सुरळीत करण्याचे प्रयत्न केले. क्रेनच्या सहाय्याने ट्रक बाजूला घेतल्यानंतर रस्त्यावर पडलेली चाके बाजूला सरकवण्यात आली.
रात्रीचा प्रवास धोकादायक
अपघात घडलेल्या ठिकाणी अरुंद पूल असल्याने येथे वारंवार अपघात घडत असल्याचे स्थानिकांकडून सांगितले जाते. तीव्र उतार , अति वेगात वाहणारी वाहने यामुळे याठिकाणी अपघात होण्याची शक्यता नाकारता येत नाही.
