पुणे: शहरातील वीज ग्राहकांना गेल्या काही दिवसांपासून अवास्तव (Pune News) बिलांचे मेसेज येत असल्याने संताप आणि गोंधळाचे वातावरण निर्माण झाले आहे. उन्हाळा अद्याप पूर्णपणे सुरू झालेला नसताना, एसी किंवा पंख्यांचा वापर वाढलेला नसताना युनिटमध्ये मोठी वाढ दाखवून दुप्पट रक्कम आकारली जात असल्याची तक्रार ग्राहक करत आहेत. (Latest Marathi News)
दर महिन्याला ठरावीक वीज वापर असलेल्या मध्यमवर्गीय कुटुंबांना अचानक वाढीव बिलांचे मेसेज आल्याने धक्का बसला आहे. अनेक कुटुंबे आपले मासिक बजेट निश्चित करून त्यानुसार खर्चाचे नियोजन करतात. 20 तारखेच्या सुमारास बिल येते, याची सवय असल्याने काही जण मेसेजवर आलेली रक्कम पाहून थेट ऑनलाइन भरणाही करतात. मात्र या महिन्यात अपेक्षेपेक्षा खूप जास्त रक्कम दाखवली गेल्याने शंका उपस्थित होत आहेत.
विशेष म्हणजे प्रधानमंत्री सूर्यघर मोफत वीज योजनेअंतर्गत सौरऊर्जा वापरणाऱ्या काही ग्राहकांनाही अवास्तव बिल आल्याची तक्रार आहे. मोफत वीज आणि अतिरिक्त वीज विक्रीचा लाभ मिळावा या उद्देशाने सोलार पॅनेल बसवलेल्या ग्राहकांना देखील वाढीव युनिट दाखवले जात असल्याने या योजनेच्या अंमलबजावणीवर प्रश्नचिन्ह निर्माण झाले आहे.
चुकीचे मीटर रीडिंग, अंदाजे बिलिंग किंवा तांत्रिक बिघाड यापैकी नेमके कारण काय, याबाबत अधिकृत स्पष्टीकरण मिळालेले नाही. संबंधित अधिकाऱ्यांशी संपर्क साधल्यानंतर समाधानकारक उत्तर मिळत नसल्याची तक्रार आहे. ग्राहकांनी बिलातील युनिट तपासणे, मागील 3 महिन्यांच्या वापराशी तुलना करणे आणि शंका असल्यास तक्रार नोंदवणे आवश्यक आहे. अन्यथा चुकीच्या बिलामुळे आर्थिक ताण वाढण्याची शक्यता आहे.
