सागर जगदाळे
Pune News: भिगवण : तक्रारवाडी स्मशानभूमीतील अंधार आणि सोलर हायमास्ट दिवे बंद पडल्याबाबत पुणे प्राईम न्यूजने नुकतीच सविस्तर बातमी प्रसिद्ध केली होती. या बातमीची तात्काळ दखल घेत तक्रारवाडीचे सरपंच शरद वाघ यांनी संबंधित ठेकेदाराशी संपर्क साधून सोलर हायमास्ट दिवे तातडीने दुरुस्त करण्याच्या सूचना दिल्या.
सदर सोलर हायमास्ट दिव्यांच्या बॅटऱ्या खराब झाल्यामुळे दिवे अनेक महिन्यांपासून बंद होते. त्यामुळे रात्रीच्या अंधारात स्मशानभूमीत अंत्यसंस्कार करताना ग्रामस्थांना मोठ्या गैरसोयीचा सामना करावा लागत होता. या गंभीर प्रश्नावर पुणे प्राईम न्यूजने प्रभावीपणे आवाज उठवल्यानंतर ठेकेदाराने तातडीने बॅटऱ्या बदलून नवीन यंत्रणा बसवली. परिणामी स्मशानभूमी परिसरात पुन्हा एकदा उजेड पडला असून अंधार दूर झाला आहे.
दरम्यान, काही दिवसांपूर्वी राज्याचे कृषिमंत्री दत्तात्रय भरणे यांनाही अंत्यविधीप्रसंगी टॉर्चच्या उजेडात जावे लागल्याची घटना समोर आली होती. या पार्श्वभूमीवर या प्रश्नाचे गांभीर्य अधिक ठळक झाले होते.
स्मशानभूमी परिसरातील अंधार दूर झाला असला तरी स्मशानभूमीकडे जाणारा रस्ता मात्र अद्याप समस्याग्रस्त आहे. गावापासून स्मशानभूमीपर्यंतच्या रस्त्यावर ठिकठिकाणी मोठे खड्डे पडले असून रात्री दिवाबत्ती नसल्यामुळे अंत्यविधीसाठी मृतदेह घेऊन जाताना मोठी अडचण निर्माण होते. एखाद्या दिवशी अपघातासारखी अनुचित घटना घडण्याची शक्यता नाकारता येत नाही, अशी भीती ग्रामस्थ व्यक्त करत आहेत.
म्हणूनच स्मशानभूमीतील दिव्यांप्रमाणेच रस्त्याच्या दुतर्फा दिवाबत्तीची सोय करावी तसेच रस्त्याची तातडीने दुरुस्ती करावी, अशी मागणी नागरिकांकडून करण्यात येत आहे.
पुणे प्राईम न्यूजने उचललेला मुद्दा प्रशासनापर्यंत पोहोचून त्यावर कार्यवाही झाली, हा या बातमीचा सकारात्मक परिणाम मानला जात असला तरी तक्रारवाडीतील विकासाचा प्रवास अजून अपूर्ण असल्याचे वास्तव समोर येत आहे.
◼ चौकट
ग्रामपंचायत तक्रारवाडीचा कारभार स्वीकारून आठ दिवस होताच प्राथमिक गरज ओळखून स्मशानभूमीतील अंधार दूर करण्यासाठी ठेकेदाराशी संपर्क साधून सोलर हायमास्ट दिवे त्वरित सुरू करण्यात आले. आता प्रश्न आहे तो रस्त्याचा. तोही लवकरच मार्गी लावण्याचा प्रयत्न केला जाईल. रस्ता वन खात्याच्या हद्दीतून जात असल्यामुळे काही पाठपुरावा आवश्यक आहे. त्यासाठी वन खात्याशी पत्रव्यवहार करून आवश्यक ती कार्यवाही केली जाईल.
— शरद वाघ, सरपंच, तक्रारवाडी
