पुणे: पुण्यातील (Pune News) कोथरूड भागात एका महिलेने तिच्या पतीवर उकळता चहा ओतल्याची धक्कादायक घटना समोर आली आहे. या घटनेत पतीच्या चेहऱ्याला गंभीर इजा झाली असून पोलिसांनी याप्रकरणी पत्नीवर गुन्हा दाखल केला आहे. वसंतनगर परिसरात राहणारे 27 वर्षांचे रवी दीपक गागडे हे एका ठिकाणी सिक्युरिटी गार्ड म्हणून नोकरी करतात. त्यांचा दोन वर्षांपूर्वी 22 वर्षीय प्रिया नावाच्या तरुणीशी विवाह झाला होता. मात्र गेल्या काही दिवसांपासून या पती-पत्नीमध्ये पैशांच्या कारणावरून सतत खटके उडत होते.
नेमकी घटना 31 डिसेंबर रोजी सकाळी 10:30 वाजता घडली. प्रिया ही रवी यांच्याशी काहीतरी बोलण्याचा प्रयत्न करत असताना रवी यांनी तिच्या बोलण्याकडे जाणीवपूर्वक दुर्लक्ष केले. रवी हे काहीच प्रतिसाद न देता डोळे मिटून झोपल्याचे नाटक करत होते. यामुळे प्रिया प्रचंड चिडली आणि तिने रागाच्या भरात स्वयंपाकघरातून गॅसवरचा उकळता चहा आणून थेट पतीच्या चेहऱ्यावर ओतला. या अचानक झालेल्या प्रकारामुळे रवी यांचे कपाळ आणि चेहरा भाजला असून त्यांना मोठा धक्का बसला आहे.
जखमी झाल्यानंतर रवी यांनी लगेच ससून रुग्णालय गाठून वैद्यकीय उपचार घेतले. त्यानंतर त्यांनी कोथरूड पोलीस ठाण्यात पत्नीविरोधात रीतसर तक्रार दिली. या प्रकरणाचा अधिक तपास पोलीस कर्मचारी मोहन दळवी करत आहेत. पती-पत्नीमधील किरकोळ वादातून अशा प्रकारे टोकाचा निर्णय घेतल्याने परिसरात मोठी चर्चा सुरू आहे.
