पुणे: पुणे शहरात गेल्या काही दिवसांपासून (Pune News) गुन्हेगारीच्या घटनांनी डोके वर काढले आहे. शुक्रवारी मार्केटयार्ड परिसरात मोजेश शेखापुरे या तरुणावर पूर्ववैमनस्यातून गोळीबार करण्यात आला होता. साहिल महेंद्रसिंग चव्हाण आणि बालाजी रामजी उमाप या दोघांनी जुन्या वादातून मोजेशला लक्ष्य केले. भरवस्तीत झालेल्या या गोळीबारामुळे परिसरात घबराट पसरली होती. घटनेनंतर आरोपी फरार झाले होते.
मार्केटयार्ड परिसरातील वखार महामंडळाजवळ झालेल्या भरदिवसा गोळीबार प्रकरणाचा छडा लावण्यात पुणे पोलिसांच्या गुन्हे शाखेला यश आले असून, दोन मुख्य आरोपींना विदेशी पिस्तुलासह बेड्या ठोकण्यात आल्या आहेत.
गुन्हे शाखेच्या पथकाने तांत्रिक विश्लेषण आणि खबऱ्यांच्या जाळ्याचा वापर करून आरोपींचा माग काढला. हे आरोपी नांदेड सिटी परिसरात लपल्याची खात्रीशीर माहिती मिळताच पोलिसांनी तिथे सापळा रचला. पोलिसांची चाहूल लागताच आरोपींनी पळ काढण्याचा प्रयत्न केला, पण पथकाने शिताफीने त्यांच्या मुसक्या आवळल्या.
