पुणे: भोसरी पोलीस स्टेशनच्या (Pune News) हद्दीत बेकायदेशीररीत्या पिस्तूल (Pune Crime) व जिवंत काडतूस बाळगल्याच्या प्रकरणातील आरोपीस पुणे येथील जिल्हा व सत्र न्यायालयाने जामीन मंजूर केला. अशी माहिती आरोपीचे वकील ॲड. नितीन भालेराव यांनी दिली. अजय लक्ष्मण नखाते असे जामीन मंजूर झालेल्या आरोपीचे नाव आहे.
मिळालेल्या माहितीनुसार, भोसरी पोलीस ठाण्यातील अधिकारी व त्यांचे पथक परिसरात गस्त घालीत असताना गुरुवारी (ता. 4 डिसेंबर) गुप्त बातमीदारामार्फत माहिती मिळाली की, देवकर वस्ती, मोकळे मैदान, पुणे येथे एक अज्ञात व्यक्ती बेकायदेशीररीत्या पिस्तूल व काडतूस घेऊन संशयास्पदरीत्या फिरत आहे. मिळालेल्या माहितीनुसार पोलिसांनी तात्काळ सापळा रचून अजय नखाते या व्यक्तीस अटक केली. अटकवेळी आरोपीकडून एक पिस्तूल व एक जिवंत काडतूस जप्त करण्यात आले.
यानंतर आरोपीस अटक करून प्रथमवर्ग न्यायदंडाधिकारी यांच्या न्यायालयात हजर करण्यात आले असता, पुढील कारवाईसाठी आरोपीची रवानगी येरवडा मध्यवर्ती कारागृहात करण्यात आली होती. कारागृहात असताना आरोपीतर्फे ॲड. नितीन भालेराव यांच्यामार्फत पुणे जिल्हा व सत्र न्यायालयात जामिनाचा अर्ज दाखल करण्यात आला.
दरम्यान, जामिनाच्या सुनावणीदरम्यान आरोपीतर्फे कोणताही गुन्हा केलेला नसून खोट्या प्रकरणात अटक झाल्याचा तसेच गुन्हा दाखल करण्यात विलंब झाल्याचा युक्तिवाद करण्यात आला. दोन्ही बाजूंचा युक्तिवाद ऐकून पुणे येथील जिल्हा व सत्र न्यायाधीश के. पी. क्षीरसागर यांनी आरोपीस अटी व शर्तींवर जामीन मंजूर करण्याचे आदेश दिले. या प्रकरणात ॲड. मिनाक्षी चव्हान, ॲड. यश विधाते आणि ॲड. प्रांजल मुरके यांनी सहकार्य केले.
